Qafqaz Müsəlmanları İdarəsinin (QMİ) sədri, şeyxülislam Allahşükür Paşazadə Ramazan bayramı münasibətilə Azərbaycan xalqını təbrik edib. QMİ-dən verilən məlumata görə, təbrikdə deyilir:

Bismillahir-rəhmanir-rəhim!

Möhtərəm həmvətənlərim, əziz müsəlman qardaş və bacılarım!

Dünya müsəlmanlarının əziz günü -- Mübarək Ramazan bayramı münasibətilə hamınızı səmimi qəlbdən təbrik edir, Allahdan oruc və namazlarınızın qəbul, dualarınızın müstəcab olmasını diləyirəm.

Əzəmət və sevinci hədsiz olan bu ülvi bayram insanlara sonsuz səadət və fəxarət bəxş edir. Həmd-səna olsun uca Allaha ki, Onun rizasını qazanmaq üçün müsəlman qardaş və bacılarımız bu mübarək ay boyunca bütün ibadətlərini sonsuz ehtiram, fərəh və səylə tamamlayaraq, Ramazani-Şərifin bayram səadətinə qovuşmağa nail olmuşlar. Qoy İslam dininə ehtiramımı nümayiş etdirmiş, Allahın vacib hökmü olan oruc ibadətini səmimi hisslərlə başa vurmuş xalqımıza bu mübarək ayın fəzilət və bərəkətlərindən nəsib olsun.

Savab, ülfət ayı olan Ramazan bəşər övladına dözüm, mərhəmət, xeyirxahlıq, yardımlaşmanı təlqin edir. Bu ülvi bayram günündə qohum-əqrəba, valideynlərə baş çəkilməsi, küsülülərin barışması, yetim, kimsəsiz və ehtiyacı olanlara şəfqət göstərilməsi, dünyasını dəyişmiş yaxınların qəbirlərinin ziyarəti müstəhəb əməllərdəndir. Allah Təbarəkə və Təalanın lütfü və mərhəməti sayəsində Ramazan bayramını qarşılayan xalqımızın ülvi arzuları vətənimiz üçün səadət, əmin-amanlıq istəkləri ilə qovuşur. Bu əziz gündə biz Allaha dualar edirik ki, inşallah, işğal altında olan torpaqlarımızın azad edilməsini, dövlətçiliyimizin davamlı olaraq tərəqqisini, Azərbaycanın dünya birliyində mövqe və nüfuzunun daha da möhkəmlənməsini bizlərə nəsib etsin.

Bu əziz bayram günündə qədirbilən xalqımız Azərbaycanın milli-mənəvi dəyərlərinin dirçəldilməsi və inkişafında əvəzsiz xidmətləri olmuş ümummilli liderimiz Heydər Əliyevin ruhuna rəhmət oxuyur və onun layiqli davamçısı İlham Əliyev həzrətlərinə Azərbaycanın bugünkü uğurları və gələcək tərəqqisi naminə fəaliyyətində böyük nailiyyətlər diləyirlər”.

Əfqanıstanın Pul-i Humri şəhərindəki məsciddə açılmış iftar süfrəsi zamanı partlayıcı qurğunun işə salınması nəticəsində terror aktı törədilib

Ahlibeyt.az-ın İslamazeri -yə istinadən məlumatına görə,Əfqanıstanın şimalındakı Bağlan vilayətinin mərkəzi Pul-i Humri şəhərindəki məsciddə iftar saatlarında meydana gələn partlayışda 25 nəfər yaralanıb.

Əfqanıstan Daxili İşlər Nazirliyinin Təhlükəsizlik rəhbəri general Əyyub Salangi sosial media vasitəsilə etdiyi açıqlamada partlayışın Pul-i Humri məscidinin həyətində iftar hazırlığı aparan onlarla adamın arasında baş verdiyini qeyd edib.

Terror aktında ikisi qadın olmaqla, 25 nəfərin yaralandığını qeyd edən Salangi yaralıların xəstəxanaya aparıldığını açıqlayıb. Hadisənin baş verdiyi iftar süfrəsində şəhərin şura vəkillərinin də olduğu bildirilib. Terror aktında məsuliyyəti heç bir qruplaşma üzərinə götürməyib.