Məşhəd zəvvarlarına şad xəbər: Hərəmdə yeni imkanlar istifadəyə veriləcək

Məşhəd şəhərində İmam Rzanın (ə) müqəddəs ziyarətgahında yeni və nəhəng layihələr həyata keçirilir. Onlar tezliklə zəvvarların istifadəsinə veriləcək.

Ahlibeyt.az-ın Salamnews-a istinadən məlumatına görə, Məşhəd şəhərində İmam Rzanın (ə) müqəddəs ziyarətgahındakı eyvanların və səhnlərin alt təbəqələrinin yaradılması, artırılması və genişləndirilməsi işləri davam edir.

Plana əsasən hərəm kompleksinin içində olan bütün həyətlərin alt qatı yəni zirzəmi qatları da zəvvarların istifadəsinə veriləcək.

Layihənin icrası prosslərinə baş çəkən İmam Rza Ziyarətgahı İdarəsinin (Astan Qüdsi Rəzəvi. red.) sədri höccətül-islam vəl-müslimin Seyid İbrahim Rəisi bildirib ki, bu layihə zəvvarların izdihamını azaltmaq və onların rahatlığını təmin etmək üçün həyata keçirilir.

Qeyd edək ki, İmam Rzanın (ə) hərəmində alt qatın yaradılması ilk dəfə 20 il öncə başlayıb və bu layihə çərçivəsində İmam Rzanın (ə) mübarək zərihinin olduğu yerin alt qatı təmir edilib və istifadəyə verilib.