BMT Baş Assambleyasının komitə iclasında Azərbaycana qarşı həyata keçirilən dezinformasiya kampaniyaları pislənilib

Xarici İşlər Nazirliyinin mətbuat xidmətinin rəhbəri Hikmət Hacıyev Nyu-Yorkda BMT Baş Assambleyasının informasiya məsələləri üzrə komitəsinin iclasında iştirak edib.

Ahlibeyt.az-ın Azərtac-a istinadən məlumatına görə, iclasda çıxış edən Hikmət Hacıyev ənənəvi və onlayn media, həmçinin sosial şəbəkələr vasitəsilə saxta xəbərlər, dezinformasiyanın yayılması və propaqanda fəaliyyətinin həyata keçirilməsinin ifadə azadlığını ciddi şəkildə pozduğunu qeyd edib, “ideoloji təcavüz”, “informasiya müharibəsi” və ya “hibrid müharibəsi” kimi fəaliyyətlərin beynəlxalq sülh və təhlükəsizlik üçün ciddi təhdid yaratdığını vurğulayıb.

Bu xüsusda, XİN rəsmisi BMT Baş Assambleyasının hələ 1947-ci ildə 108-ci plenar iclasında “Propaqandaya qarşı tədbirlər” adlı qətnamə qəbul edərək sülhə qarşı təhdidi, sülhün pozulmasını və ya təcavüz aktını ruhlandıran bütün növ propaqanda formalarını qınadığını xatırladıb və Azərbaycanın təcrübəsi ilə bölüşüb.

O deyib: “SSRİ-nin dağılması dövründə və müstəqilliyinin ilk illərindən Azərbaycan Ermənistanın yürütdüyü “informasiya təcavüzü” və “informasiya müharibəsi” ilə üzləşmişdir. Ermənistan BMT nizamnaməsinə zidd olaraq, gücdən istifadə etməklə Azərbaycana qarşı hərbi təcavüz və işğalı, işğal olunmuş ərazilərdə bir milyondan çox azərbaycanlıya qarşı törətdiyi qanlı etnik təmizləməni gizlətmək üçün informasiya müharibəsi, propaqanda və dezinformasiya əməllərinə əl atıb. Erməni lobbi dairələrinin dəstəyi ilə bu tendensiya “hibrid müharibə” formasında bu gün də Azərbaycana qarşı davam etməkdədir”.

Hikmət Hacıyev Ermənistanın beynəlxalq media nümayəndələrini çaşdıraraq müxtəlif bəhanələrlə Azərbaycanın işğal olunmuş ərazilərinə qanunsuz səfərlərə sövq edilməsi məsələsinə də diqqəti çəkib, bəzi hallarda bu kimi səfərlərin etik və obyektiv jurnalizm prinsiplərinə zidd olaraq, propaqanda məqsədilə istifadə olunduğunu diqqətə çatdırıb. “Biz beynəlxalq media nümayəndələrinin informasiya əldə etmək hüququna hörmətlə yanaşırıq. Amma xüsusilə münaqişə zonalarında fəaliyyət zamanı dövlətlərin akkreditasiya qaydalarına, sərhəd-keçid rejimlərinə, qanunlarına və ərazi bütövlüyünə hörmətlə yanaşılmalı, həmçinin münaqişəyə birtərəfli və qeyri-obyektiv yanaşma olmamalıdır”, - deyə mətbuat xidmətinin rəhbəri vurğulayıb.

Ermənistan-Azərbaycan, Dağlıq Qarabağ münaqişəsinin Azərbaycana qarşı olan yeganə propaqanda və dezinformasiya mənbəyi olmadığını deyən Hikmət Hacıyev birinci Avropa Oyunları dövründə ölkəmizə qarşı aparılan və hətta “psixoloji müharibə” səviyyəsinə çatdırılan propaqanda və dezinformasiya kampaniyaları barədə ətraflı danışıb və bir çox aparıcı media orqanlarının bu prosesdə iştirak etməsinin təəssüf və narahatlıq doğurduğunu vurğulayıb. O, hər hansı bir fakt ortaya qoymadan və cavab hüququna imkan vermədən ölkəmizə qarşı bu qəbildən olan qarayaxma və dezinformasiya kampaniyalarının hələ də aparıldığını BMT tribunasından beynəlxalq ictimaiyyətin diqqətinə çatdırıb.

Bu kimi propaqanda və dezinformasiya əməllərinə qarşı mübarizədə Azərbaycanın media plüralizminin inkişafı və medianın peşəkarlığının artırılmasının dəstəklənməsinə üstünlük verdiyini qeyd edən Hikmət Hacıyev medianın müstəqilliyini qorumaqla və ona hörmət etməklə ölkəmizin medianın inkişafı üçün müxtəlif proqramlar həyata keçirdiyi barədə danışıb. Həmçinin cəmiyyətin savadlılıq və məlumatlılıq səviyyəsinin yüksək olmasının xüsusən xaricdən qaynaqlanan propaqanda və dezinformasiyaya qarşı effektiv vasitə olduğunu bildirib.

O, bu sahədə BMT-nin rolunun artırılmasının vacibliyinə toxunub və BMT-nin strateji kommunikasiya siyasətinə dəstək məqsədilə ölkəmizdə milli səviyyədə BMT-nin məqsəd və məramlarının, Davamlı inkişaf məqsədlərinin təşviq olunması istiqamətində media müstəvisində həyata keçirilən tədbirlər barədə məlumat verib. H.Hacıyev BMT-nin gələcək qlobal kommunikasiya fəaliyyətində multikulturalizm və sivilizasiyalararası dialoq məsələlərinə xüsusi diqqət yetirilməsinin vacibliyini bildirib.

Bununla bərabər, o, BMT Təhlükəsizlik Şurasının Ermənistan-Azərbaycan, Dağlıq Qarabağ münaqişəsi ilə əlaqədar qəbul etdiyi qətnamələrinin yerinə yetirilməməsinin Azərbaycan ictimaiyyətində haqlı və legitim suallar yaratdığını qeyd edib, BMT-nin informasiya strategiyasının effektivliyini artırmaq üçün qəbul edilmiş qətnamə və qərarların icrasının vacibliyini diqqətə çəkib.

Qeyd edək ki, BMT Baş Assambleyasının informasiya komitəsi 1979-cu ildə təsis olunub və komitənin mandatına BMT-nin ictimai informasiya siyasətinin müəyyən edilməsi, dünyada yeni, ədalətli və effektiv informasiya məkanının yaradılması ilə sülhün gücləndirilməsinə töhfə vermək kimi məsələlər daxildir.