İran Səudiyyə Ərəbistanını Həccdə baş verən faciəyə görə beynəlxalq məhkəməyə verir

İranın baş prokuroru İbrahim Rəisi Məkkədə Həcc ziyarəti zamanı 700-dən çox zəvvarın ölümü ilə nəticələnən hadisəyə görə kral ailəsini beynəlxalq məhkəməyə verəcəyini deyib.

Ahlibeyt.az-ın AnsPress-ə istinadən məlumatına görə,Prokurorun sözlərinə görə, faciə ilə nəticələnən hadisəyə görə Səudiyyə Ərəbistanı kral ailəsi məsuliyyət daşıyır. Rəisi bildirib ki, faciəyə səbəb kral ailəsinə məxsus kortejin hərəkəti üçün zəvvarların yolunun kəsilməsi olub. Bu zaman iki qarşı-qarşıya hərəkət edən insanlar bir nöqtədə toplaşmağa başlayıblar və zəvvarlar ayaqlar altında qalıblar.

Səudiyyə Ərəbistanının daxil işlər nazirliyi iddiaları təkzib edib və İran mediasını yalan xəbər yaymaqda ittiham edib.

İran prezidenti Həsən Ruhani Birləşmiş Millətlər Təşkilatının (BMT) baş assambleyasında çıxışı zamanı Səudiyyə Ərəbistanı rəhbərliyini faktla bağlı ətraflı istintaq araşdırması aparmağa çağırıb.

“Məkkədə baş vermiş ürək parçalayan hadisəyə görə kədərimi bildirmək istəyirəm. Faciədə itki verən insanların başı sağ olsun. Səudiyyə Ərəbistanı hökuməti xəsarət alanlara ciddi qayğı göstərməli, həmçinin, hadisənin səbəbləri araşdırılmaıdır”.

Hadisə nəticəsində ölənlər sayı 769 nəfərə çatıb. 934 nəfər xəsarət alıb. Ölənlər arasında 136 İran vətəndaşı var və 354 nəfər isə itkin hesab olunur.