Dini ayinlər həyata keçirən din xadimlərinin fəaliyyəti lisenziyalaşdırılacaq

Azərbaycandan kənarda dini təhsil almış şəxslərin dini ayinlər həyata kçirməyi və din təbliğ etməyi qadağan ediləcək.

Dini fəaliyyətlə bağlı olacaq dəyişikliklər layihəsi bu gün Milli Məclisin Hüquq siyasəti və dövlət quruculuğu və İnsan haqları komitələrinin birgə iclasında müzakirə edilərək parlamentin plenar sessiyasına tövsiyə olunub.

İnzibati Xətalar Məcəlləsinin 300-cü maddəsinə edilmiş dəyişikliklə dini etiqad haqqında qanunvericiliyin pozulması hesab olunan fəaliyyətlər müəyyənləşdirilib. Belə ki, dəyişiklik qüvvəyə mindikdən sonra müvafiq icra hakimiyyəti orqanı ilə razılaşdırılmadan vətəndaşların dini təhsil müəssisələrində təhsil almaq üçün xaricə göndərilməsi, din xadimlərinin mübadiləsi, İslam dininə aid ayin və mərasimlərin Azərbaycandan kənarda dini təhsil almış vətəndaşlar tərəfindən həyata keçirilməsi, qanunla müəyyən olunmuş qaydada satışına icazə verilən dini təyinatlı ədəbiyyatın, əşyaların və dini məzmunlu başqa məlumat materiallarının müvafiq icra hakimiyyəti orqanının razılığı ilə yaradılan ixtisaslaşdırılmış satış məntəqələrindən kənarda satılması, əcnəbilər və vətəndaşlığı olmayan şəxslər tərəfindən dini təbliğatın aparılması dini qanunvericiliyin pozulması hesab olunacaq.

Əcnəbilər və vətəndaşlığı olmayan şəxslər tərəfindən dini təbliğatın aparılması qanunsuz olaraq dini təyinatlı ədəbiyyatı, əşyaları və dini məzmunlu başqa məlumat materiallarını yaymaqla (satılmaqla) törədildikdə Cinayət Məcəlləsinin müvafiq maddəsinə əsasən cinayət məsuliyyətinə səbəb olur.

Azərbaycanda fəaliyyət göstərən və dini ayinlər həyata keçirən din xadimlərinin fəaliyyəti lisenziyalaşdırılmalıdır.

Bu təklifi Milli Məclisin Hüquq siyasəti və dövlət quruculuğu komitəsinin iclasında millət vəkili Rəfael Cəbrayılov irəli sürüb. O bildirib ki, bu addım din xadimlərinin qanunvericiliyə zidd hərəkətlər etməsinin qarşısını alar, eyni zamanda onların fəaliyyətini tənzimləmiş olar: “İslamdan xəbəri olmayanın əlinə bir bloknot alıb “Yasin” oxuması ilə tez-tez rastlaşırıq. Bunlara son qoyulmalıdır».

Azərbaycandan kənarda dini təhsil almış vətəndaşların İslam dininə aid ayin və mərasimlər həyata keçirməsinin qadağan edilməsi ilə bağlı İnzibati Xətalar Məcəlləsinə təklif olunan dəyişikliklərə millət vəkili Çingiz Qənizadənin münasibəti maraqlı olub. O xatırladıb ki, Qafqaz Müsəlmanları İdarəsinin sədri Allahşükür Paşazadə Özbəkistanın Səmərqənd şəhərində təhsil alıb: “Məsələyə bu cür yanaşılması ortaya bu tip bəzi suallar çıxara bilər. Ona görə də dini ayinlər həyata keçirən din xadimləri ilə bağlı məsələdə ortaq məxrəcə gəlmək lazımdır”.

Azərbaycanda 52 ixtisaslaşmış dini kitab mağazası açılacaq

Bu barədə isə Milli Məclisin İnsan hüquqları komitəsinin sədri Rəbiyyət Aslanova Azərbaycan Respublikasının İnzibati Xətalar və Cinayət məcəllələrinə təklif olunan dəyişikliklərin müzakirəsində bildirib.

R. Aslanova Dini Qurumlarla İş üzrə Dövlət Komitəsinin binası yaxınlığında fəaliyyət göstərən «Çıraq» adlı mağazanın heç bir icazə olmadan dini kitablar, xüsusilə də xristianlığı təbliğ edən kitablar satdığını vurğulayıb.

apa.az