Azərbaycan İlahiyyat İnstitutuna (Aİİ) qəbul olan tələbələrin qeydiyyatı davam edir.

Ahlibeyt.az-ın verdiyi xəbərə görə, İnstitutdan AZƏRTAC-a bildirilib ki, bu il dinşünaslıq və islamşünaslıq ixtisası üzrə ali təhsil müəssisəsinə 72 nəfər qəbul olub. Onların 40 faizi qeydiyyatdan keçib.

Qəbul olan tələbələr kifayət qədər yüksək balla Aİİ-ni seçiblər. Bu günə olan məlumata görə, dinşünaslıq ixtisasına ən yüksək bal 523, islamşünaslıq ixtisasına ən yüksək bal isə 346 olub.

Xatırladaq ki, 2018/2019-cu tədris ilində Aİİ-nin ixtisaslarına keçid balının 150 olmasına baxmayaraq, dinşünaslıq ixtisasına keçid balı 292, islamşünaslıq ixtisasına isə 200 bal idi.

Sənədlərin qəbulu avqustun 27-dək hər gün (şənbə, bazar günləri istisna olmaqla) saat 10:00-17:00 arasında Yasamal rayonu, Əhməd Cəmil küçəsi, 41A ünvanında (Bakı Dövlət Universitetinin keçmiş İlahiyyat fakültəsinin inzibati binası) aparılır.

İnstitutda tələbələrin qeydiyyatdan keçməsi üçün lazım olan hər cür şərait yaradılıb. Aİİ-nin rektoru Ceyhun Məmmədov bakalavriat səviyyəsinə qəbul olmuş abituriyentlərin qeydiyyatının aparılması üçün məsul şəxsin təyin edilməsi haqqında əmr imzalayıb. Qeydiyyatın vaxtında və dəqiq aparılması, növbəlilik prinsipi, qayda-qanunun və nizam-intizamın qorunması diqqət mərkəzində saxlanılır.

Qeyd olunan vaxtadək ali təhsil müəssisəsinə gəlib qeydiyyatdan keçməyənlər ixtisaslarından imtina etmiş sayılırlar.