Xocavəndin işğal olunmasının 25-ci ildönümü ilə bağlı tədbir keçirilib

Bu gün Azərbaycanın ən gözəl guşələrindən biri olan Xocavənd rayonunun işğalından 25 il keçir. Xocavənd rayonu 2 oktyabr 1992-ci il tarixində Ermənistan Respublikasının Silahlı Qüvvələri tərəfindən işğal edilmişdir.

Ahlibeyt.az-ın Apa-ya istinadən məlumatına görə, bu gün Beyləqanda məcburi köçkünlər üçün salınmış Yeni Xocavənd qəsəbəsində Xocavənd rayonunun işğal olunmasının 25-ci ildönümünə həsr olunmuş tədbir keçirilib.

Tədbir iştirakçıları qəsəbədə şəhidlərin xatirəsinə ucaldılmış abidə kompleksini ziyarət etdikdən sonra Mədəniyyət evində toplantı təşkil olunub. Mərasimdə hadisənin şahidləri çıxışı edib, ədəbi-bədii kompozisiya nümayiş olunub.

Qeyd edək ki, işğal nəticəsində rayonun azərbaycanlılar yaşayan 10 kəndində 1723 yaşayış evi ermənilər tərəfindən yandırılaraq əmlakları talan edilib, 47 sənaye, 144 kənd təsərrüfatı obyekti dağıdılaraq viran edilib. Erməni vandalları tərəfindən 17 təhsil müəssisəsi, 4 məktəbəqədər tərbiyə ocağı, 32 səhiyyə müəssisəsi, 59 mədəniyyət obyekti, 10 tarixi abidə dağıdılıb. Rayonun infrastrukturuna aid olan 12 rabitə qovşağı, 341 km aftomobil yolları, 32 körpü, 42 su anbarı və 316 km su kəməri xətti dağıdılıb, talan edilərək yararsız hala salınıb. İşğal nəticəsində vurulmuş maddi, mənəvi ziyanla barəbər, rayonun bitki və meşə örtüyünə də böyük miqdarda zərər dəyib. Belə ki, rayonun 1202 ha meşə sahəsindəki qiymətli ağac növləri qırılaraq məhv edilib.

Xocavəndlilər 13 nəfəri qadın, 13 nəfəri uşaq olmaqla 145 nəfər şəhid verib, rayon sakinlərindən 300 nəfərdən çox insan sağlamlığını itirib və ya əlil olub, 243 uşaq valideynlərindən birini, 68 qadın həyat yoldaşını itirib. Müxtəlif dövrlərdə girov götürülmüş 110 nəfər dinc sakinlərdən 49 nəfəri əsir və girovluqda olarkən erməni terroru və vəhşiliyinin qurbanı olub, bir ailədən olan 3 uşaq hər iki valideynini itirib.