“İƏT Modeli - 2017” proqramının bağlanış və qaliblərin mükafatlandırılması mərasimi “ İslam Həmrəyliyi İli”nə həsr olundu

“Park İnn” otelində İslam Əməkdaşlığı Təşkilatı (İƏT) Gənclər Forumunun təşəbbüsü, Azərbaycan Respublikası Gənclər və İdman Nazirliyi və Bakı Dövlət Universitetinin tərəfdaşlığı ilə artıq yeddinci ildir ki, davam edən “İƏT Model - Beynəlxalq Münasibətlər Akademiyası” proqramı çərçivəsində “İƏT Model-Azərbaycan” adlı milli mərhələnin 2017-ci il üzrə təntənəli qapanış və qaliblərin mükafatlandırma mərasimi həyata keçirilmişdir.

Ahlibeyt.az-ın İslam.az-a istinadən məlumatına görə, tədbirdə İƏT-ə üzv ölkələrin Azərbaycanda təmsil olunan səfirləri, diplomatik nümayəndələr, dövlət qurumları rəhbərləri və nümayəndələri, ali təhsil müəssisələri rəhbərliyi, ictimai xadimlər, həmçinin bu ilki  proqramın məzunları olan 100-dən çox gənc  iştirak etmişlər.

Öncə “İƏT Modeli – Beynəlxalq Münasibətlər Akademiyası” proqramının Azərbaycandakı gedişat və nəticələrini əks etdirən videoçarx nümayiş olunmuş, daha sonra çıxış edən İƏT Gənclər Forumu Avrasiya üzrə Regional Mərkəzinin direktoru Elçin Əsgərov layihənin məqsəd və vəzifələri, uğurları, beynəlxalq səviyyədə qazanılan əlaqaləri, bu proqramda Azərbaycanın mühüm rolu, 40-a yaxın ölkədə paralel keçirilən bu layihənin ilk təşəbbsünün də məhz Azərbaycandan başlaması haqqında danışmışdır. E.Əsgərovun dediyinə görə keçən 7 il ərzində İƏT ölkələrində layihə çərçivəsində keçirilən təlim və tədbirlərdə 20 minə yaxın tələbə iştitak etmiş, bunların 900-dən çoxu və ən aktivləri məhz Azərbaycan gəncləri olmuşdur.

Tədbirdə digər təşkilatçılar adından Bakı Dövlət Universitetinin professoru, dekan Azad Rzayev, BDU rektoru professor Abel Məhərrəmovun toplantı iştirakçılarına təbrik müracətini oxumuş,  artıq 7 ildir tərəfdaş olduqları bu layihənin gənclərin beynəlxalq əməkdaşlığına mühüm töhfə verdiyini, gənclər vasitəsi ilə Azərbaycanın daha çox tanıdılmasına xidmət etdiyinə inandıqlarını bildirmişdir. Mərasimdə, həmçinin, Fələstin dövlətinin Azərbaycandakı səfiri Naser Əbdülkərim Rəhim tədbirdəki bütün səfirlər və diplomatik nümayəndələrin adından, AR Prezidenti yanında Gənclər Fondunun aparat rəhbəri Faiq Qürbətov və Dini Qurumlarla İş üzrə Dövlət Komitəsinin beynəlxalq əlaqələr şöbəsinin müdiri Nicat Məmmədli isə təmsil etdiyi qurum adından çıxış edərək, bu layihənin İƏT arealında gənc liderlərin formalaşmasında və əməkdaşlığın inkişafında oynadığı rolu xüsusi vurğulamışlar. Həmçinin vurğulanmışdır ki, İƏT ölkələri gənclərinin əməkdaşlığına yönələn bu layihədə Azərbaycan gənclərinin uğurları və aparıcı rolu, Azərbaycan Prezidentinin təşəbbüsü ilə bu il elan olunmuş İslam Həmrəyliyi İlinə bir töhfə sayıla bilər.

Qeyd edək ki, “İƏT Model - Beynəlxalq Münasibətlər Akademiyası” İƏT Gənclər Forumunun təşəbbüsü ilə təsis edilmiş beynəlxalq təhsil proqramıdır və icrasına ilk dəfə 2011-ci ildə Azərbaycanda start verilmişdir. Hazırda bu təhsil proqramı İslam Əməkdaşlıq Təşkilatına üzv 40-a yaxın ölkədə eyni zamanda həyata keçirilir.

Bu ilki “İƏT Model-Azərbaycan” mərhələsində BDU, ADA, DİA, Dillər, Slavyan və  15-ə yaxın digər universitet və ali məktəblərdən tələbə iştirak etmiş, 7 həftə ərzində onlar İƏT arealı ölkələrinin siyasi, mədəni, iqtisadi problemlərinə, qlobal strategiyalar və beynəlxalq münasibətlərə həsr olunmuş seriya mühazirələr dinləmiş, İƏT-ə üzv ölkələrin Azərbaycanda təmsil olunan səfir və diplomatik missiya nümayəndələri ilə görüşlərdə iştirak etmiş, beynəlxalq münasibətlərin bir çox aspektləri ilə praktiki və yaxından tanış olmuşlar.

Proqramın əsas hissəsi olan yekun tədbirdə isə proqram iştirakçıları İƏT Xarici İşlər Nazirləri Şurasını reallığa maksimum yaxınlaşdırılmış formada simulyasiya edən, 22 İƏT-ə üzv ölkəni təmsil edən nümayəndə heyətləri ilə “İƏT XİN Sammiti”i keçirmiş, İƏT məkanında mühüm  siyasi xarakter daşıyan və dünyanı narahat edən problemləri müzakirə edərək müvafiq qərarlar qəbul etmişlər.

Qapanış mərasiminin sonunda proqramda xüsusi istedad və bacarığı, “İƏT XİN Sammiti”ndə fəallığı ilə seçilən gənclər səfirlərin, diplomatların, dövlət qurumları nümayəndələrinin iştirakı ilə qiymətli hədiyyələr və diplomlarla təltif olunmuş və onlardan ən yaxşıları hər il İƏT-ə üzv ölkələrin birində keçirilən “İƏT Model - Qlobal Sammit”ində iştirak etmək hüququ əldə etmişlər.