Sumqayıt şəhər “Cümə” məscidində maarifləndirici tədbir keçirilib

Martın 28-də Dini Qurumlarla İş üzrə Dövlət Komitəsinin dəstəyi ilə Sumqayıt şəhər  “Cümə”  məscidində  “Milli-mənəvi dəyərlərimizin təbliği və dini radikalizmlə mübarizə” layihəsi çərçivəsində növbəti tədbir  keçirilib.

Ahlibeyt.az-ın DQİK mətbuat xidmətinə istinadən məlumatına görə,tədbiri giriş sözü ilə  açan Sumqayıt şəhər  “Cümə”  məscidi dini icmasının sədri Rauf Sərdarov  insanların maarifləndirilməsi  istiqamətində  həyata  keçirilən  bu kimi layihələrin əhəmiyyətindən danışıb. Çıxışında əsasən İslamda Vətən və dövlət  sevgisindən  bəhs  edən icma  sədri  qeyd  edib ki, hər  bir  müsəlmanın  borcudur ki, Vətəninə, dövlətinə sadiq  vətəndaş olsun.

Dini Qurumlarla İş üzrə Dövlət Komitəsinin Sumqayıt bölgəsi üzrə şöbəsinin əməkdaşı  Ülvi Məmmədov “Milli-mənəvi dəyərlərimizin təbliği və dini radikalizmlə mübarizə” mövzusunda geniş məruzə ilə çıxış edib. Ülvi Məmmədov layihə çərçivəsində reallaşdırılan tədbirlərin əhəmiyyətindən danışaraq, dövlət başçısının dini icmalara dini maarifləndirmə və milli-mənəvi dəyərlərimizin qorunması ilə bağlı maliyyə yardımının ayrılması barədə Sərəncamını dövlətin dinə olan növbəti qayğısı kimi qiymətləndirib.

Daha sonra AMEA-nın dissertantı Samir  Ağayev  mövzu ilə bağlı çıxış edib. O bildirib ki, milli-mənəvi dəyərlərimiz qorunub saxlanılmalı, düzgün təbliğ edilməli və dini radikalizmə qarşı birlikdə mübarizə aparılmalıdır.

Sonda tədbir iştirakçılarını maraqlandıran suallar cavablandırılıb.