İslam ümmətinin vəhdəti əsirlər boyu müsəlmanlar üçün aktual mövzu olub. Bu mövzunun aktuallığı günümüzdə bir qədər də artıb. Suriyada və İraqda təkfirçi qrupların törətdikləri vəhşiliklər bir başa ümmətin parçalanmasına yönəlib. Bu parçalanmanın qarşısına almaq isə hər bir şüurlu müsəlmanın vəzifələri sırasındadır və hər kəs bacardığı qədər bu işə töhfəsini verməlidir.

Ahlibeyt.az-ın verdiyi məlumata görə bu günlərdə “Mənəvi Saflığa Dəvət” İctimai Birliyinin ofisində gənc yazar Elvin Tanrıyarın müəllifi olduğu “İslamda vəhdətin genetik kodu” adlı kitabın təqdimatı keçirilib. Müəllif  ümmətin pərakəndəliyinin aradan qaldırılmasına məhz belə töhfə vermək qərarına gəlib. Adından da göründüyü kimi, E.Tanrıyar müsəlmanları birləşdirən ümumi dəyər haqqında düşüncələrini oxuculara təqdim edib.

Təqdimat mərasimində çıxış edən İctimai Birliyinin sədri, ilahiyyatçı, fəlsəfə elmləri doktoru Elşən Mustafaoğlu qeyd edib ki, sözügedən kitab üzərində  müəllifin illərdir işləyir. E.Mustafaoğlu belə həssas və aktual məsələyə diqqət ayırdığı üçün E.Tanrıyara minnətdarlığını bildirib, gələcək yaradıcılıq uğurları diləyib.

Daha sonra çıxış edən kitabın müəllifi Elvin Tanrıyar toplaşanlarla fikirlərini bölüşüb, ümmətin vəhdət məsələsinin önəmini vurğulayıb.

Qeyd edək ki, oxucular  “İslamda vəhdətin genetik kodu” kitabını “İnşaatçılar” metro stansiyasının çıxışında yerləşən “Zəka” və “Məşədi Dadaş” məscidi ərazisində yerləşən kitab mağazalarından əldə edə bilərlər.