Abgül Süleymanova və Tale Bağırova qarşı yeni ittihamlar irəli sürülüb

Abgül Süleymanovun və Tale Bağırovun vəkilləri bildiriblər ki, onların müdafiə etdikləri şəxslərə qarşı yeni ittihamlar irəli sürülüb.

Hacı Tale Bağırovun vəkili İntiqam Hacıyev bildirib ki, Bağırov Tale Kamil oğlu indiyə kimi Azərbaycan Respublikası Cinayət Məcəlləsinin 233-cü maddəsi ilə (İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə), (3 ilə qədər həbs) ittiham olunurdu. Amma indi ona qarşı Azərbaycan Respublikasının Cinayət Məcəlləsinin 221.2-ci maddəsi ilə (Bir qrup şəxs tərəfindən Xuliqanlıq) yeni ittiham əlavə olunub.

Hacı Abgül Süleymanovun vəkili Anar Qasımlı da müdafiə etdiyi şəxsə qarşı yeni ittihamlar irəli sürüldüyünü bildirib. Beləki, Abgül Süleymanov indiyə qədər Cinayət Məcəlləsinin 234.1-ci maddəsi ilə (Satış məqsədi olmadan qanunsuz olaraq narkotik vasitələri və ya psixotrop maddələri istehlak miqdarından artıq miqdarda əldə etmə və ya saxlama) ittiham olunurdu. Yeni ittihamlara görə isə Abgül Süleymanovun işinə 234.4.3-cü maddə (qanunsuz olaraq külli miqdarda narkotik vasitələri, psixotrop maddələri və ya prekursorları hazırlama, istehsal etmə, əldə etmə, saxlama, daşıma, göndərmə və ya satma) əlavə olunub. Eyni zamanda Cinayət Məcəlləsinin 228.1-ci maddəsi ilə (Qanunsuz olaraq odlu silah, onun komplekt hissələri, döyüş sursatı(yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) ittiham əlavə olunub.

azadxeber.az