Bakıda daha bir neçə dindar həbs edildi

“Media forum”un məlumatına əsasən, mayın 20-si saat 19-20 radələrində metronun “Memar Əcəmi” satnsiyası ilə 3-cü mikrararoyon dairəsi arasında yerləşən “Killer” kişi geyimləri mağazasına gələn polis əməkdaşları “Azadxeber.az” saytının baş redaktoru Nicat Əliyevi, mağazanın meneceri Valeh Məmmədağaoğlunu, satıcı Qurban Əlibalaoğlunu və 3 müştərini saxlayıblar. Müştərilərdən birinin adının Cavid olduğu xəbər verilir.

“İslamazeri.az” xəbər verir ki, həmin gün “Killer” mağazasının yaxınlığındakı “Müntəzir” çay evinə də gələn polis əməliyyatçıları “Əhli-Beyt” məddahı kimi tanınan Məşədi Natiq Əhmədovu zorakılıqla aparıblar. Çay evinin 3 işçisi və digər 2 müştəri də tutulub.

“Müntəzir” çay evində həbs edilənlər Nəsimi Rayon Polis İdarəsinin 19-cu bölməsinə aparılıb. Onlar izahatları alındıqdan və sorğu-sual edildikdən sonra sərbəst buraxılıblar.

“Faktxeber”in məlumatına əsasən, Nicat Əliyev və onunla bir yerdə tutulanlar Yasamal rayonu 27-ci polis bölməsinə gətiriliblər. Artıq Nicat Əliyev barəsində həbs qəti-imkan tədbiri seçilib.

“Azadxeber.az” saytının verdiyi məlumata görə, dünən gecə saat 23-24 radələrində Nicat Əliyevin yaşadığı ünvanda axtarış aparılıb. Mülki geyimli şəxslər Nicat Əliyevlə birlikdə evə daxil olublar və evin bütün otaqlarında axtarış aparıblar. Axtarış zamanı mülki geyimli şəxslər bir neçə dini kitab, Quran və noutbuk götürərək evi tərk ediblər.