“Səfəvi, Əfşar, Rusiya və Osmanlı dövlətlərinin Azərbaycan siyasətində Naxçıvan” monoqrafiyası işıq üzü görüb

AMEA Naxçıvan Bölməsinin Tarix, Etnoqrafiya və Arxeologiya İnstitutunun Qədim və orta əsrlər tarixi şöbəsinin müdiri, tarix üzrə fəlsəfə doktoru, dosent İlham Əliyevin “Səfəvi, Əfşar, Rusiya və Osmanlı dövlətlərinin Azərbaycan siyasətində Naxçıvan (XVIII əsrin I yarısı)” adlı monoqrafiyası işıq üzü görüb.

Ahlibeyt.az-ın verdiyi xəbərə görə, AMEA mətbuat xidmətinin məlumatında bildirilir ki, tədqiqat əsərində ilk dəfə olaraq XVIII əsrin birinci yarısında Azərbaycan Səfəvi və Əfşar dövlətlərinin daxili, Rusiya və Osmanlı dövlətlərinin xarici siyasətində Azərbaycan və bu siyasətdə isə Naxçıvanın yeri araşdırılıb.

Naxçıvanda XVIII əsrin birinci yarısında baş verən siyasi proseslər araşdırıldıqdan sonra aydın olub ki, tarixin bu dönəmində bir sıra Azərbaycan bölgələri kimi Naxçıvan diyarında da ictimai-siyasi vəziyyət sabit olmayıb.

1700-1747-ci illəri əhatə edən monoqrafiyada əldə olunmuş faktlar təhlil və müqayisə edilərək çıxarılan elmi nəticələr ümumiləşdirilib. Əsərin sonunda ingilis dilində onun yığcam şəkildə icmalı verilib.

Qeyd edək ki, aparılan tədqiqatın əsas mənbəşünaslıq bazasını müxtəlif illərdə ölkəyə səfər edən əcnəbi diplomat, səyyah, coğrafiyaşünas, eləcə də tarixçilərin əsərləri və yol qeydləri təşkil edib.