ABŞ husilərlə danışıqlara başladığını elan edib

ABŞ Dövlət Katibliyi rəsmiləri bu gün elan ediblər ki, Yəmən münaqişəsinin həlli istiqamətində "Ənsarullah" hərəkatı ilə danışıqlara başlayıblar.

Ahlibeyt.az SalamNews-a istinadla xəbər verir ki, bu barədə ABŞ dövlət katibinin Yaxın Şərq məsələləri üzrə müavini və köməkçisi Devid Şinker məlumat verib.

ABŞ rəsmisi Səudiyyə Ərəbistanına səfəri zamanı jurnalistlərə verdiyi açıqlamada bəyan edib ki, onlar husilərlə danışıqlara başlayıblar.

O deyib: "İmkan daxilində husilərlə danışıqlara başlamışıq. Məqsəd Yəmən münaqişəsi ilə bağlı hamı üçün məqbul olan və danışıqlar yolu ilə əldə edilən həllə nail olmaqdır."

Qeyd edək ki, bu ilk dəfədir ki, ABŞ birbaşa husilərlə danışıqlar apardığını bəyan edir. Xarici KİV-lər ötən həftə iddia edib ki, ABŞ Səudiyyəyə husilərlə birbaşa danışıqlar üçün müxtəlif təkliflər verib.