Suriya Qolan Təpələri ilə bağlı BMT TŞ-nın təcili iclas keçirməsini tələb edib

BMT-dəki Suriya nümayəndəliyi ABŞ-ın Qolan Təpələri üzərində İsrailin suverenliyinin tanınması ilə əlaqədar olaraq Təhlükəsizlik Şurasının təcili iclasının keçirilməsi təşəbbüsü ilə çıxış edib.

Ahlibeyt.az-ın TASS-a istinadən verdiyi xəbərə görə, martda TŞ-da sədrlik edən Fransa iclasın tarixini müəyyənləşdirməlidir.

Eyni zamanda BMT Təhlükəsizlik Şurasında yer alan 5 Avropa ölkəsi Almaniya, Polşa, Belçika, Fransa və Britaniya Donald Trampın işğal edilən Qolan yüksəkliklərini İsrail ərazisi kimi tanıması addımını rədd ediblər.

Həmçinin ABŞ prezidenti tərəfindən beynəlxaq normaların pozulması faktı bir çox ölkələr tərəfindən etirazla qarşılanıb.

Qeyd edək ki, ABŞ prezidenti Donald Tramp İsrailin Qolan Təpələri üzərindəki suverenliyini rəsmən tanıyıb.Prezident bəyannaməsinin imzalanma mərasimi Vaşinqtonda Ağ Evdə keçirilib. Tədbirdə ABŞ-da səfərdə olan İsrail Baş naziri Binyamin Netanyahu da iştirak edib.