Həzrət Peyğəmbər(s): "Hüseynin müsibətində ağlayan gözlərdən başqa bütün gözlər Qiyamət günü ağlayacaqdır".

Bu axşam - 20 avqust şam azanı zamanı (gün batdıqdan sonra) Hicri qəməri təqvimi ilə Məhərrəm ayının 1- ci günü daxil olur.

Bu axşam Qəməri təqvimi ilə yeni il daxil olur. Hicri-qəməri təqvimi ilə bu gün(20 avqust) 1441-ci ilin zilhəccə ayının 30-u, sabah isə 1442-ci ilin məhərrəm ayının biridir.

Hicri-qəməri ili bir sıra ərəb dövlətlərində rəsmi təqvim ili kimi nəzərdə tutulub. Aşura faciəsinin məhz bu ayda baş verdiyinə görə Azərbaycan da daxil olmaqla bir sıra müsəlman ölkələrində hüzn və əzadarlıq ayı kimi qeyd edilir.

Mühərrəm hüzn və kədər ayıdır.Məhərrəm və səfər ayı ərzində bir çox ölkələrdə olduğu kimi Azərbaycan müsəlmanları da əzadarlıq məclislərində iştirak edir, İmam Hüseynə (ə.s) və Kərbəla şəhidlərinə matəm saxlayırlar.

Məhərrəm ayı İmam Hüseynin (ə.s.) matəm ayı olması ilə yanaşı, məhərrəm ayının ilk gecəsində yeni qəməri il başlayır.

On ikinci əsrdə yaşamış tanınmış islam alimi Seyyid ibni Tavus "Misbahuz-Zair" və "Muhəcud-Dəəvat və Mənhəcul-İbadat" əsərində yazır ki, zilhəccə ayının son günündə iki rəkətli namazın qılınması tövsiyə edilir. Bildirilir ki, qılınan iki rəkətli namazın hər ikisində Həmd surəsini 1 dəfə, İxlas sürəsini 10 dəfə, eləcə də Ayətəl-küsrsini 10 dəfə oxumaq lazımdır. Ardınca aşağıdakı münacatı oxumaq:

"İlahi ma əmiltu fi  hazihis-sənəti min əməlin nəhəytəni ənhu və ləm tərdəhu, və nəsituhu və ləm tənsəhu, və dəəvtəni ilət-tövbəti bədə ictirai ələykə. Allahummə fəinni əstəğfirukə minhu fəğfir li, və ma əmiltu min əməlin yuqərribuni iləykə fəqbəlhu minni, və la təqtə rəcai minkə ya Kərim!"

Tərcüməsi:

"İlahi bu ildə məni çəkindirdiyin bir sıra əməllərim oldu ki sən ondan razı deyilsən, Mən o (pis) əməli unutdum amma sən unutmadın, Sənə qarşı cürət etdikdən sonra yenə məni tövbəyə çağırdın, İlahi mən o əmələ görə səndən əfv diləyirəm, İlahi sənə yaxınlaşdıran əməli məndən qəbul et!, Sənə olan ümidimi kəsmə ey kəramət sahibi!"

Həmçinin Məhərrəm ayının ilk gecəsi 2 rükətli namaz qılmaq müstəhəbdir. Namazın “məhərrəm ayının ilk gecəsinin namazı” niyyəti ilə qılınır və hər rükətdə “Fatihə”dən sonra 11 dəfə “İxlas” surəsi oxunur.

İlk gecəni əhya saxlayıb ibadətdə keçirmək də müstəhəbdir. Bütün gecəni ayıq qala bilməyənlər bacardıqları qədər əhya saxlaya bilərlər.

Məhərrəm ayının ilk günü oruc tutmaq müstəhəbdir. Qəzası olmayanlar “məhərrəm ayının ilk gününün orucu” niyyəti ilə, qəzası olanlar isə qəza niyyəti ilə oruc tuta bilərlər.

Habelə, məhərrəm ayının ilk günündə də iki rükət namaz qılmaq müstəhəbdir. “Məhərrəm ayınını ilk günü” niyyəti ilə qılınan bu namazdan sonra 3 dəfə aşağıdakı dua oxunur:

«اللّهم انت الاله القدیم و هذه سنةٌ جدیدةٌ فاسئلك فیها العصمة من الشیطان و القوَّة علی هذه النّفس الامّارة بالسُّوء»

Allahummə əntəl ilahul qədim və hazə sinnətun cədidətun fəəs-əlukə fiha əl-ismətu min şeytan vəl quvvətu əla hazihin nəfsəl əmmarətə bissu.

“İlahi, sən əzəli və səxavətli Allahsan. Və bu yeni ildir. Səndən istəyirəm ki, məni şeytandan qoruyub pisliyə çağıran nəfsim üzərində qalib edəsən”.