İraq hökuməti Kürdüstanın danışıq tələbini rədd edib

İraq hökuməti bəyan edib ki, İraqın bütövlüyünə riayət etməyincə hava limanlarının açılması və muxtar bölgəyə vəsait ayrılması mövzusunda Kürdüstan hökumətilə heç bir danışıqlara girməyəcək.

Ahlibeyt.az-ın məlumatına görə, İslamazeri.com "Reuters"-ə istinadla xəbər verir ki, Kürdüstan rəhbərliyi referendumdan sonra bir neçə dəfə Bağdadla əlaqələri bərpa etməyə və bölgəyə valyuta axınına nail olmağa çalışıb.

"Hazırki kollektiv cəzalandırmanın dayandırılması üçün biz Baş nazir Heydər əl-Abadini İraq konstitusiyasına uyğun olaraq hər hansı formada dialoqa dəvət edirik. Sərhəd keçidləri, daxili ticarət, vətəndaşlara xidmət, bank və hava limanları məsələlərini müzakirə etmək istəyirik", - deyə kürd rəhbərliyinin müraciətində deyilir.

Rəsmi Bağdad isə Kürdüstanla danışıqların ilkin şərti kimi sentyabrın 25-də keçirilmiş referendum nəticələrinin ləğvini və mərkəzi İraq hökumətinin tabeçiliyinə keçməyi tələb edir.