Bu gün Azərbaycanda Aşura qeyd olunur

Qafqaz Müsəlmanları İdarəsi (QMİ) Qazılar Şurasının fətvasına əsasən,bu il Aşura -Məhərrəm ayının 10-u oktyabrın 1-nə təsadüf edir.

Ahlibeyt.az-ın məlumatına görə fətvada qeyd olunur ki, Məhərrəmlik mərasimləri İmam Hüseynin (ə) şəninə uyğun, onun amallarına yaraşan tərzdə keçirilməlidir. Mövcud qanunvericiliyə əsasən, əza məclisləri məscidlərdə, ibadət ocaqlarında və onlara aid ərazilərdə keçirilməli və ictimai asayişə mane olmamalıdır.

Qafqaz Müsəlmanları İdarəsi Əhli Beytin hər iki məzhəb üçün əziz olduğunu nəzərə alaraq Azərbaycanda yaşayan hər iki məzhəb ardıcıllarına İslami həmrəylik nümayiş etdirərək İmam Hüseyn (ə) mərasimlərində dini dəyərlərə uyğun olaraq birgə iştirak etmələrini tövsiyə edir.

Həmçinin son bir neçə ildə olduğu kimi, bu gün də bəzi məscid və ziyarətgahlarda qanvermə aksiyaları keçiriləcək.

Qeyd edək ki, Məhərrəm ayı sentyabrın 22-də başlayıb.