Ayətullah Xamenei: Müsəlman ölkələri sözdə deyil, əməldə addımlar atmalıdır

Ayətullah Seyid Əli Xamenei Myanmada müsəlmanlara qarşı törədilən terrordan danışıb.

O, beynəlxalq qurumların və insan haqları carçılarının  bu faciələr qarşısında sükut etməsini  pisləyib.

Ahlibeyt.az-ın. Maide.az-a istinadla məlumatına görə,  Ayətullah Xamenei bildirib ki, bu məsələnin yeganə həll yolu  müsəlman ölkələrinin sözdə deyil, əməldə  addımlar atması ilə  mümkündür.  “Əlbəttə, əməldə addımlar atmaqda məqsəd ordu yeritmək deyil. Müsəlman ölkələri  Myanmanın qəddar hökumətinə qarşı siyasi və iqtisadi təzyiqləri artırmalıdır. Həmçinin bu cinayətlər əleyhinə beynəlxalq tribunalarda haqq səsini qaldırmalıdır.”

Ayətullah Xamenei  Myanmada baş verən faciələrin  müsəlmanlar və buddistlər arasında məzhəb qarşıdurması kimi təqdim edilməsinin kökündən yanlış olduğunu qeyd edib. “Ola bilər  bu hadisədə  məzhəb təəssübkeşliyinin təsiri olsun. Amma bu faciənin icraçısı  Myanma hökumətidir və onun başında  da Nobel sülh mükafatı qazanan qəddar bir qadın durur. Bu hadisələr, əslində, Nobel sülh mükafatının ölümünü göstərdi."

Ayətullah Xamenei əlavə edib ki,  bu faciələr  İslam ölkələri, beynəlxalq təşkilatlar və  insan haqları müdafiəsi iddiasında olan  ikiüzlü və yalançı hökumətlərin gözü qarşısında törədilir.

O,  BMT baş katibinin  Myanmada baş verənləri pisləməklə kifayətlənməsini tənqid edərək bildirib ki,  insan haqları carçıları bəzi vaxtlar  bir ölkədə olan bir cinayətkarı cəzalandırmaq üçün  səs-küy salırlar. Amma Myanmada on minlərlə insanın  qətliamı və didərgin salınması qarşısında heç bir reaksiya vermirlər.