Myanmada baş verənlər etnik təmizləmənin bariz nümunəsidir - BMT-dən açıqlama

BMT-nin insan haqqları üzrə rəsmisi Zeyd Rəad əl-Hüseyn Myanmada rohingiya müsəlmanlarına qarşı törədilən qətliamları kəskin tənqid edib.

Ahlibeyt.az-ın məlumatına görə, İslamazeri.com "Aljazeera"-ya istinadən xəbər verir ki, bu gün Cenevrədə keçirilən toplantıda BMT-nin İnsan Hüquqları Şurasına müraciət edən təşkilat rəsmisi Myanma hökumətinin ötən ay müsəlman azlığa qarşı hərbi fəaliyyətlərinin aşkar şəkildə həddini aşmış olduğunu dilə gətirib. Onun sözlərinə görə, artıq 270 mindən çox rohingiyalı Banqladeşə sığınıb, bir çoxu isə sərhədi keçə bilməyib, yerlilərə məxsus xeyli sayda kəndlər yandırılıb, amansız qətllər törədilib.

"Mən Myanma hökumətini qəddar hərbi əməliyyatlarını dayandırmağa, törədilmiş bütün cinayətlərə görə məsuliyyət daşımağa çağırıram. Hökumət Rohingiya əhalisinə qarşı amansız və genişmiqyaslı diskriminasiyanı dyandırmalıdır", - deyə əl-Hüseyn çıxışında vurğulayıb.

BMT səlahiyyətlisi vurğulayıb ki, Myanmada baş verənlər etnik təmizləmə siyasətinin ən bariz nümunəsidir.