Allahşükür Paşazadə işğal olunmuş ərazilərin qaytarılmasının vacibliyini erməni katolikosun diqqətinə çatdırıb

Moskvada Azərbaycan, Rusiya və Ermənistan dini liderlərinin görüşü başlayıb.

Ahlibeyt.az-ın verdiyi xəbərə görə, APA-nın Moskva müxbirinin məlumatına əsasən, Müqəddəs Danil monastırında keçirilən görüşdə Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadə, Moskva və bütün Rusiyanın patriarxı Kirill və bütün ermənilərin katolikosu II Qaregin iştirak edirlər.

Görüşdə Ermənistan-Azərbaycan, Dağlıq Qarabağ münaqişəsi əsas müzakirə mövzusu olub.

Azərbaycan və Ermənistan dini liderlərinin görüşü Patriarx Kirillin təşkilatçılığı ilə keçirilir.

Üçtərəfli görüşdən əvvəl isə Allahşükür Paşazadə ilə Kirill arasında ikitərəfli görüş keçirilib.

Mətbuatın iştirakı olmadan keçirilən görüşdə QMİ və Moskva Patriarxlığı arasındakı münasibətlər müzakirə olunub.

QMİ sədri Şeyxülislam Hacı Allahşükür Paşazadə bilrib ki, "Biz din xadimləriyik, hərbçi deyilik. Problemin elə həll yolunu tapmalıyıq ki, xalqlara ziyan gəlməsin. Dini liderlərin münaqişənin həllinə töhfə vermək imkanları var. Dağlıq Qarabağ Azərbaycan ərazisidir. Müharibə də Azərbaycan ərazisində gedib. Azərbaycan torpaqları işğal olunub. Gəlin, bu gün Kirilin rəhbərliyi ilə dövlət rəhbərlərimizə çağırış edək ki, münaqişənin sülh yolu ilə həll üçün səylərini artırsınlar.

Milyonlarla insan öz ata-baba yurduna gedə, qəbirlərini ziyarət edə bilmir. Həmin yerlər işğal altındadır. Faktlar var ki, qəbirlər təhqir edilir. Bu heç də dindarlara yaraşmır. Dağlıq Qarabağ ətrafındakı rayonların yavaş-yavaş qaytarılmasına başlamaq lazımdır", - deyə QMİ sədri qeyd edib.

A. Paşazadə bildirib ki, Rusiya vətəndaşı Dilqəm Əsgərov yaxınlarının qəbrini ziyarət etmək istəyərkən Kəlbəcərdə girov götürülüb: "Girovlar, əsirlər azad olunmalıdır. Biz ilk addımı atmalıyıq ki, insanlar öz ata-baba yurdlarına qayıtsınlar. Sadəcə, görüşmək xatirinə görüşməməliyik:

Biz bir yerdə yaşayacağıq, heç kəs heç yerə getməyəcək. Ona görə də bizim görüşün nəticəsi olmalıdır.

Mən bir daha erməni katolikosuna müraciət edirəm. Bu görüşdən sonra yenə əvvələ qayıtmayaq. Bir daha qeyd edirəm ki, mən bu görüşə böyük ümidlə baxıram.

Ümid edirəm ki, bu görüşün bütün Qafqaz xalqları üçün bəhrəsi olacaq. Əlbəttə, Dağlıq Qarabağ münaqişəsinin həlli çox uzanıb. Buna kimi də görüşlərimiz olub, təəssüflər olsun ki, nəticəsiz qalıb. Təkcə Qarabağda deyil, Azərbaycan-Ermənistan sərhədində dinc insanlar həlak olurlar. Biz bu məsələyə bu cur yanaşsaq, çətin ki, həll yoluna gələk".