İraqın baş naziri Heydər əl-Abadi Mosul şəhərində İŞİD terror təşkilatının darmadağın edilməsi üzrə əməliyyat zamanı insan hüquqlarının pozulması hallarına yol verildiyini etiraf edib.

Ahlibeyt.az-ın Salamnews-a istinadən xəbərinə görə,baş nazirin sözlərini “Associated Press” agentliyi təqdim edib.

Əl-Abadi oxşar hüquq pozuntularının “ayrı-ayrı hallarda” baş verdiyini qeyd edib və günahkarların layiqli cəzanı alacaqlarına söz verib.

İraq baş nazirinin sözlərinə əsasən, insan hüquqlarının pozulmasında əli olan şəxslər ya “düşüncəsiz”, ya da İraq təhlükəsizlik qüvvələrinə ləkə yaxmaq niyyəti ilə İŞİD maraqlarına uyğun fəaliyyət göstəriblər.

İyulda “Beynəlxalq amnistiya” hüquq-müdafiə təşkilatı ABŞ tərəfindən rəhbərlik edilən İŞİD-ə qarşı beynəlxalq koalisiyanı humanitar hüquq normalarını pozmaqda və Mosulda hərbi cinayətlər törətməkdə ittiham etdiyi hesabat dərc edib.

Koalisiya isə öz növbəsində bu hesabatı “məsuliyyətsiz” adlandırıb.

Xatırladaq ki, 2014-cü ilin yayından Mosul İŞİD-in İraqdakı başlıca istinadgahı idi. 2016-cı ilin oktyabrında İraq Silahlı Qüvvələri şəhərin terrorçulardan azad edilməsi məqsədilə hücuma keçib. İyulun 10-da əl-Abadi İŞİD-in Mosulda məğlubiyyətə uğramasına dair rəsmi bəyanat verib.