Ramazan ayında Rusiyada təxminən 6 milyon müsəlman oruc tutur - müfti

Rusiyada yaşayan müsəlmanların 30%-dən çoxu və ya təxminən 6 milyon nəfəri müqəddəs Ramazan ayında oruc tutur.

Ahlibeyt.az-ın Salamnews-a istinadən verdiyi xəbərə görə, bu barədə Rusiya Müsəlmanlarının Mərkəzi Ruhani İdarəsi administrasiyasının rəhbəri, Başqırdıstan Müsəlmanlarının Dini İdarəsinin sədri müfti Məhəmməd Tacuddinov məlumat verib.

“Bizdə olan məlumata görə, dindar müsəlmanların 30%-dən çoxu, yəni Rusiyada yaşayan 20 milyon müsəlmandan təxminən 6 milyonu oruc tutur. Bununla belə, heç kəs tərəfindən dəqiq statistika aparılmır.”, - Tacuddinov söyləyib.

O, Ramazanda “heç də bütün namaz qılanların məscidə getmədiyini, məscidin ziyarətinin mütləq olmadığı insanlar kateqoriyasının olduğunu" əlavə edib: "Bu kateqoriyaya qadınlar, uşaqlar, xəstələr, zəif insanlar daxildir. Bundan başqa, elə insanlar da var ki, yaşadıqları yerin məsciddən uzaq olması və gecə namazının gec olması ilə əlaqədar camaat namazı qıla bilmirlər, namazı evdə ailələri ilə qılırlar.

Müsəlmanlar axşam və gecə vaxtlarını dualarla, müqəddəs "Quran"ı oxumaq və öyrənməklə keçirməyə çalışırlar. Bu ayda mütləq olaraq hər bir müsəlmanın adından yoxsullara "fitrə" adlanan sədəqə verilir.”