Başqa vaxtlarda spirtli içki içən biri Ramazan ayında oruc tuta bilərmi - Açıqlama

Artıq müqəddəs Ramazan ayını yaşayırıq. Məlumdur ki, şəriətdə bu ayda insanlara günün müəyyən saatlarında yemək-içməkdən imtina etmək buyurulur.

Müqəddəs ayın başlanması ilə ənənəvi müzakirələrə də start verilib.Müzakirəyə çıxarılan məsələlərdən biri də başqa vaxtlarda spirtli içki içən birinin Ramazan ayında oruc tutması ilə bağlıdır .

Ümumiyyətlə  belə insanlar oruc tuta bilərmi?

Ahlibeyt.az-ın məlumatına görə, Qafqaz Müsəlmanları İdarəsinin səlahiyyətli nümayəndəsi Hacı Şahin Həsənli  Modern.az-a açıqlamasında bildirib ki, içki içməsindən asılı olmayaraq oruc tutmaq bütün müsəlmanlara vacibdir:

“Müsəlman olan şəxs oruc tutmalıdır, bu ona vacibdir. İçki içirsə, günah edirsə, bunun cəzası öz yerindədir. Amma oruc tutmaq dini vəzifədir. Müqəddəs Qurani-Kərim  kitabında da qeyd edilib ki, içki, şərab günah əməldir və  haramdır. Bundan çəkinmək lazımdır. İnsanın içkidən çəkinməsi onun Allah qarşısında dini vəzifəsidir”.

İlahiyyatçı içki içənlərin bir ay da olsa, bu əməldən uzaqlaşmasını müsbət addım kimi qiymətləndirib:

“Ramazan ayında da içki içilsəydi necə olacaqdı? Tutaq ki, insan Ramazan ayından öncə də, sonra da içir, amma bir aylıq Allah üçün bu əməldən uzaqlaşarsa, sonra yavaş-yavaş içkini tərk edə bilər. Hər halda içkinin günahı öz yerində qalır. Lakin bir ay Allaha sayğı əlaməti olaraq oruc tutmaq insanı hansısa bəyənilməyən əməllərdən uzaqlaşdıra bilər”.