İŞİD başçıları Raqqadan da qaçmağa başladılar

ABŞ Müdafiə Nazirliyindəki mənbə İŞİD rəhbərləri haqda məlumat yayıb.

Ahlibeyt.az-ın islamazeri.az-a istinadən verdiyi xəbərə görə,bu barədə "NewYork-Times" məlumat yayıb.

Məlumata əsasən, İŞİD terror təşkilatının rəhbərliyinin bir sıra nümayəndələri Suriyanın Raqqa şəhərini tərk ediblər.

ABŞ Müdafiə Nazirliyindəki mənbədən bildiriblər ki,  Raqqadan qaçan İŞİD komandirləri Suriya və İraqdakı digər “daha təhlükəsiz” şəhərlərə getmək niyyətindədirlər. Bildirilib ki, Raqqada 3-4 min terrorçu qalaqdadır.

Daha əvvəl Pentaqon nümayəndəsi bildirmişdi ki, İŞİD lideri Əbu Bəkr əl-Bağdadi Raqqadadır. Lakin fevral ayının ortasında İraq hərbçiləri bildiriblər ki, əl-Bağdadi Raqqadan İraq ərazisinə gəlib.

“Reuters” agentliyi isə ABŞ və İraq kəşfiyyat xidmətlərindəki mənbələrə istinadən ötən gün bildirib ki, əl-Bağdadi, çox güman ki, İraq ərazisindəki səhrada gizlənir və terrorçuların dayaq məntəqələrində peyda olmamağa çalışır. O, gün ərzində bir neçə dəfə məkan dəyişdirir, daha çox İŞİD-in işğalı altındakı dinc sakinlərin yaşadığı yaşayış məntəqələrində dayanır, terrorçuların dayaq məntəqələrində yox. Bundan başqa, terrorçuların lideri izlənilmə ehtimalı olduğu üçün rabitə vasitələrindən istifadə etmir.

Qeyd edək ki, Raqqa şəhəri İŞİD-in Suriya “paytaxtı” hesab olunur.