Türkiyədə 65 dövlət və hökumət başçısının iştirak etdiyi Humanitar Sammit başlayıb

Bu gün Türkiyənin İstanbul şəhərində birinci Dünya Humanitar sammiti öz işinə başlayır.

Ahlibeyt.az-ın Salamnews-a istinadla verdiyi məlumata görə, sammitdə iştirak etmək üçün Azərbaycan prezidenti İlham Əliyev, BMT-ın baş katibi Pan Gi Mun, Almaniya kansleri Angela Merkel, Fələstin dövlət başçısı Mahmud Abbas artıq Türkiyəyə gəliblər.

Ümumilikdə 5200 nəfər nümayəndənin iştirak etdiyi sammitdə dünyanın 177 ölkəsindən nümayəndələr, o cümlədən 65 dövlət və hökumət başçısı iştirak edir.

Belə ki, sammitdə Ukrayna prezidenti Pyotr Poroşenko, Küveyt əmiri Sabah al- Əhməd əl- Caber əs-Sabah, Niderlandrın baş naziri Mark Rutte, Livanın baş naziri Tammam Salam, habelə Bolqarıstanın baş naziri, Səudiyyə Ərəbistanının xarici işlər naziri, Nigeriyanın, Qırğızıstanın, Madaqaskarın, Makedoniyanın, Çernoqoriyanın, Rusiyanın, Yəmənin və digər ölkələrin liderləri, hökumət başçıları iştirak edirlər.

Qeyd edək ki, sammit BMT-ın baş katibinin təşəbbüsü və Birləşmiş Millətlər Təşkilatının Humanitar Məsələlər üzrə Koordinasiyası İdarəsinin təşkilatçılığı ilə keçirilir.