İlk Günəş tutulması Azərbaycanda müşahidə olunmayacaq

Bu ilin ilk Günəş tutulması martın mart;n 8-dən - 9-na keçən gecə, Bakı vaxtilə saat 03:20 radələrindən başlayaraq, 05:57-dək davam edəcək.

Ahlibeyt.az-ın AMEA mətbuat xidmətinə istinadən verdiyi xəbərə görə, AMEA N.Tusi adına Şamaxı Astrofizika Rəsədxanasının elmi işlər üzrə direktor müavini, fizika üzrə fəlsəfə doktoru Xıdır Mikayılov məlumat verərək bildirib ki,cari ilin ilk Günəş tutulması hadisəsi martın 9-da baş verəcək. Tutulma Bakı vaxtilə saat 03:20 radələrindən başlayaraq, 05:57-dək davam edəcək.

2016-cı ilin Günəş tutulmasının tam fazası Yerin ekvatorial hissəsində görünəcək. Bu tutulma zamanı Ayın kölgəsi əsasən Hind və Sakit okeanların üzərindən keçərək, cənub-şərqi Asiya və Avstraliyanın şimal-şərq hissələrində görünəcək.

Təbiət hadisəsi zamanı səmada “gündüz ulduzunun” ətrafında möhtəşəm mənzərə yaranacaq, Merkuri və Venera öz parlaqlığıyla xüsusi fərqlənəcək.

Məlumatda qeyd olunur ki, tutulma Azərbaycan ərazisində müşahidə olunmayacaq.

Bildirək ki,İslam dininin göstərişlərinə əsasən Günəş və Ay tutulması müşəhidə zolağına düşən ölkələrin müsəlman əhalisi Ayət namazı qılmalıdır.