Azərbaycanı İslam Ticarət, Sənaye və Kənd Təsərrüfatı Palatasında Sahibkarlar Konfederasiyası təmsil edəcək

İslam Ticarət, Sənaye və Kənd Təsərrüfatı Palatasında (İTSKP) Azərbaycan biznes icmasını Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) təmsil edəcək

Ahlibeyt.az-ın verdiyi xəbərə görə ASK-dan Salamnews-a verilən məlumatda bildirilir ki, Misirin paytaxtı Qahirə şəhərində keçirilmiş İTSKP Direktorlar Şurasının 22-ci görüşündə Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının İslam Ticarət, Sənaye və Kənd Təsərrüfatı Palatasında üzvlük məsələsi nəzərdən keçirilib və müsbət qərar verilib.

Bu günədək İslam Ticarət, Sənaye və Kənd Təsərrüfatı Palatasında ölkəmizin biznes icmasını Azərbaycan Respublikası Ticarət və Sənaye Palatası təmsil edirdi. Bu gündən etibarən isə bu missiyanı ASK həyata keçirəcək. İslam Ticarət, Sənaye və Kənd Təsərrüfatı Palatası ilə mövcud əməkdaşlıq müzakirə edilərək, əlaqələrin genişləndirilməsi istiqamətində müvafiq iş aparılacaq. Həmçinin palatanın təşkil etdiyi tədbirlərdə Azərbaycan Respublikası Sahibkarlar (İşəgötürənlər) Təşkilatları Milli Konfederasiyası fəal iştirak edəcək.

Qeyd edək ki, İslam Ticarət Palatası, İslam Əməkdaşlıq Təşkilatının (İƏT) özəl sektorla məşğul olan, İƏT-in üzv dövlətlərində biznesin inkişafına dəstək göstərən bu sahədə zəngin təcrübəyə malik bir qurumdur.