Ayətullah Xamenei Avropa və Amerikalı gənclərə müraciət ünvanlayıb

Ayətullah Seyyid Əli Xamnei Avropa və Amerikalı gənclərə müraciət ünvanlayıb.

Ahlibeyt.az-ın əldə etdiyi məlumata görə,Ayətullah Seyyid Əli Xamenei İslam peyğəmbərinə qarşı Avropada aparılan kampaniya  və islamafobiya ilə bağlı Avropalı və Amerikalı gənclərə müraciət ünvanlayıb. Müraciətin tam mətnini təqdim edirik:

Bismillahir rəhmanir rəhim

Son Fransa hadisələri və bəzi qərb ölkələrində baş verən oxşar nümunələr məni, birbaşa olaraq bu hadisələr barədə söz açmağa məcbur etmiş oldu.  Mənim müraciətim sizədir; (siz gənclərə), bu, valideynlərinizə əhəmiyyət vermədiyim anlamına gəlməz. Bu ona görədir ki, xalqlarınız və ölkələrinizin gələcəyi sizin əllərinizdə olacaq və eyni zamanda bilirəm ki, siz gənclərin qəlbində həqiqətləri anlamaq istəyi daha canlı və daha güclüdür.

Mənim müraciətim sizin siyasətçilər və dövlət başçılarınıza da deyil. Çünki, inanıram ki, onlar məqsədli şəkildə siyasət yolunu həqiqət və doğruluqdan ayırıblar.

Sizinlə İslam barəsində danışmaq istəyirəm. Xüsusilə, İslam barədə sizə təqdim olunan  sima barədə. Ötən iki onillikdə, xüsusilə Sovet İttifaqının süqut etməsindən sonra, bu böyük dini qorxunc bir düşmən kimi qələmə vermək istiqamətində bir çox səylər göstərilib. Təəssüflər olsun ki, qorxu və nifrət hissini təhrik  və ondan sui-istifadə etmək Qərbin siyasi tarixində uzun keçmişə malikdir.

Qərbin indiyə kimi aşılamağa çalışdığı qorxu hissləri barədə danışmaq istəmirəm. Müasir tarix barədə aparılan həssas araşdırmalara ötəri bir nəzər salmaqla siz, Qərb dövlətlərinin rəftarlarının sədaqətdən nə qədər uzaq olduğunu, onların digər xalqlar və mədəniyyətlər ilə ikiüzlü rəftarlarının necə tarixin yaddaşından çıxarılmasına səy göstərildiyini dərk edə bilərsiniz.

Amerika və Avropa tarixi quldarlığa görə xəcalətli, müstəmləkəçiliyə görə utanc içində, xristian olmayan və rəngli dərililərin repressiya edilməsinə görə isə rahatsızlıqlarla doludur.   Sizin tədqiqatçılarınız və tarixçiləriniz din adına katoliklər və protestantlar arasında axıdılan qanlara və ya 1-ci və 2-ci dünya müharibələri zamanı törədilən qətliamlara görə son dərəcə xəcalət çəkirlər.

Sonu görünməyən bu siyahının bəzi hissələrinə işarə etməklə, tarixi yenidən xatırlatmaq istəmirəm. Əksinə, sizdən istəyirəm ki, öz ziyalılarınızdan soruşasınız ki, nə üçün qərblilərin vicdanı bir neçə onillikdən sonra oyanıb? Nə üçün  ümumi vicdan sadəcə uzaq keçmiş barədə nəzərdən keçirilir və cari məsələlərə şamil edilmir? Nə üçün bu səylər İslam təfəkkürü və mədəniyyətinin repressiya edilməsi kimi mühüm məsələlər barəsində olan ümumi oyanışı önləmək üçün həyata keçirilir?

Siz gözəl bilirsiniz ki, "başqaları"na qarşı nifrət, qorxu və təhqir hissi,fövqəlqüdrətlərin maraqlarını təmin etmək üçün əsas baza sayılır. İndi, sizdən istəyirəm ki, özünüzdən soruşasınız ki, nə üçün İslam və müsəlmanlar qorxu və nifrətin genişləndirilməsi kimi köhnə bir siyasətin bu qədər geniş hücumlarına məruz qalır? Nə üçün dünyadakı qüdrət strukturu İslam düşüncəsini sıradan çıxartmağa çalışır? İslamın hansı düşüncə və dəyərləri super güclərin yolunda maneələrə səbəb olub? O, hansı maraqlardır ki, yalnız İslamın simasını təhrif etmək və üzərinə kölgə salmaqla amanda qala bilər?

Mənim birinci istəyim budur: İslamın simasının ləkələnməsi siyasətinin arxasında dayanan maraqlar barədə araşdırmalar aparıb, mütaliələr edin.

İkinci istəyim, düşüncələri yayındırmaq və insanları doğru yoldan uzaqlaşdırmaq üçün hesablanmış böyük səylərin əksinə olaraq, İslam dini ilə bağlı birinci mənbədən və birbaşa formada məlumat əldə edəsiniz.  Doğru olan məntiq  sizi qorxutmağa çalışdıqları məsələlərin həqiqi mahiyyəti və əsası barədə düzgün təsəvvürə malik olmanızı tələb edir.

Sizlərdən, mənim və digərlərinin İslam dini ilə bağlı anlayışın qəbul edilməsini istəmirəm. Sizdən istəyim, bu gün dünyada təsirli olan dinamizm və həqiqətin sizə, təəssüb və xurafat ilə qarışmış formada təqdim edilməsinə icazə verməməyinizdir. Onlara icazə verməyin ki, muzdlu terrorçularını sizlərə İslamın nümayəndəsi kimi təqdim etsinlər.

İslamla bağlı məlumatları birbaşa olaraq onun əsas qaynağından əldə edin. İslama dair məlumatları Qurandan və onun böyük peyğəmbərinin həyatından əldə edin. Sizdən istəyirəm ki, birbaşa olaraq müsəlmanların Quranına müraciət edəsiniz, onu oxuyasınız. Sizin indiyə qədər İslam Peyğəmbərinini(s.ə.s) həyatı və o həzrətin insani prinsipləri barədə hər hansı bir mütaliəniz olubmu?  İslamın müraciətini medialardan başqa, digər mənbələrdən əldə edibsinizmi?

İndiyə qədər özünüzdən soruşubsunuz ki, İslamın dəyərləri necə və hansı yolla dünyada ən iri elmi və intellektual sivilizasiyanı yaratmağa, əsrlər boyu dünyanın ən görkəmli alimləri və mütəfəkkirlərini yetişdirməyə nail olub?

Mən sizdən istəyirəm ki, sizinlə həqiqət arasında alçaldıcı və narahatedici bir burulğan yaratmalarına və həqiqət barədə ədalətli şəkildə qərar vermənizə xələl gətirmələrinə icazə verməyəsiniz. Bu gün medialar coğrafi sərhədləri aşıblar. Buna baxmayaraq onlara,icazə verməyin ki,sizi  öz saxta düşüncələri və təsəvvürləri ilə mühasirəyə alsınlar.

Baxmayaraq ki, heç kəs yaranmış bu boşluqları təklikdə doldura bilməz, amma, sizin hər biriniz bu boşluqları doldurmaq, özünüzü və ətrafınızdakı insanları aydınlatmaq üçün düşüncə və ədalət arasında bir körpü ola bilərsiniz. Siz və İslam arasındakı bu problemin qeyri-ixtiyarı olmasına rəğmən, sizin daim axtarışda olan maraqla dolu zehninizdə yeni sualların yaranmasına səbəb ola bilər. Bu suallara cavab tapmaq istəyi, yeni həqiqətlərin kəşf edilməsi üçün dəyərli fürsətə çevrilə bilər.

Bu üzdən, İslamla bağlı doğru və qərəzsiz bir anlayışa malik ola bilmək üçün yaranmış bu fürsəti itirməyin və sizin, həqiqətlərin kəşf edilməsinə məsuliyyətli yanaşmanız sayəsində gələcək nəsillər İslam və Qərb arasındakı münasibətləri heç bir ağrı və acı çəkmədən, düşmənçilik hissi bəsləmədən, tam vicdanlı və aydın formada qələmə almış olacaqlar.