Suriyanın “İslam Dövləti” (İŞİD) terror təşkilatı silahlılarının nəzarətində olan Rəkka şəhərindəki məktəblərdə kimya və fəlsəfə fənlərinin tədrisi qadağan edilib.

Ahlibeyt.az-ın Salamnews-a istinadla verdiyi xəbərə görə, bu barədə Suriya İnsan Hüquqlarını Müşahidə Qrupu məlumat verib.

Məlumata əsasən, kimya və fəlsəfənin tədris proqramından çıxarılması bu elm sahələrinin "Allah qanunlarına uyğun olmamaları” ilə əsaslandırılıb.

Bundan başqa, İŞİD silahlıları bəzi məktəblərdə dərslərin Suriya hökuməti tərəfindən qəbul edilmiş təhsil proqramına əsasən keçirilməsi ilə əlaqədar olaraq, əyalətdə bir sıra məktəbləri bağlayıblar.

İŞİD Rəkka məktəblərinin müəllim və direktorlarını Təşkilat tərəfindən təyin ediləcək xüsusi komissiya tərəfindən təsdiqlənmiş “İslam təhsil sistemi” hazırlamağa çağırıb. Təşkilatın məqsədi "Müsəlman təhsil planı” hazırlamaqdır. İŞİD üzvləri Təşkilatın nəzarəti altında olan ərazilərdə bu plan əsasında təhsil prosesini qurmaq niyyətindədirlər.