Müsəlman dünyasının azsaylı qadın yazıçılarından olan, parlaq imza sahibi Aminə Sədrin (Bintül-Hüda) “Xəs­təxanada görüş”povesti ana dilimizdə nəşr edildi. Bintül-Hüda haqqında tək onu demək kifayətdir ki, o şəxsiyyəti və maarifpərvər fəaliyyəti ilə öz dövrünün qadın liderinə çevilmişdir. Onun  əsərləri dərin elmi-fəlsəfi mövzuların asan dildə çatdırılması ilə fərqlənir.

Orijinallığı, dərinliyi və özünə məxsusluğu ilə seçilən “Xəs­təxanada görüş” povestidə də oxucunu həyəcanda saxlayan süjet xətti ilə yanaşı bir çox elmi-fəlsəfi mövzulara an­laşıqlı və səlis şəkildə aydınlıq gətirilir.

Əsərdə təsadüfi bir şəkildə həkim Aminə ilə tanış olan baş qəhrəman onun timsalında hər birimizin həyatını iflic edən sualların cavabını tapmağa başlayır və onlar arasında möhkəm bir dostluq bağı yaranır. Sonra gizli bir sirr nəticəsində o Aminədən uzaqlaşmaq məcburiyyətində qalır və bu onlar üçün dözülməz faciəyə bərabər olur...

Qeyd edək ki, kitabın müəllifi Aminə Sədr 1980 – cı ildə maarifpərvər fəaliyyətlərinə və onunla tutduğu barışmaz mövqeyə görə Səddam Hüseyn tərəfindən qardaşı böyük filosof və fenomenal şəxsiyyət Ayətullah Seyyid Məhəmməd Baqir Sədr ilə birlikdə eyni gündə qətlə yetirilmişdir.

Kitab Bakıda “Parlaq İmzalar” nəşriyyatı tərəfindən çap edilib və artıq şəhərin kitab mağazalarında satışdadır.