Şeyxülislam: “Bəzən məscidlərə müraciət edənlərin məqsədləri heç də iftar süfrəsi təşkil etmək olmur”

Bəzən Ramazan aylarında məscidlərə iftar süfrəsi verməklə bağlı hansısa şəxslər tərəfindən müraciətlər olunur. Bəzən bu müraciət edənlərin məqsədləri heç də iftar süfrəsi təşkil etmək deyil.

Bunu Qafqaz Müsəlmanları İdarəsinin (QMİ) sədri, Şeyxülislam Hacı Allahşükür Paşazadə deyib.

Onun sözlərinə görə, bundan özlərinə divident qazanmaq üçün istifadə edirlər.

“Başqa təriqətləri, siyasi adamları ora yığıb hansısa təbliğatı aparmaq üçün istifadə edirlər. Ona görə də indidən belə bu iftar süfrəsi verən adamların əvvəlcə siyahısı tərtib olunsun və bilinsin ki, bunlar kimlərdir. Əks halda iftar kiminsə təbliğinə çevrilir. Xüsusilə, bu il seçki ili olduğu üçün bu cür adamlardan ehtiyatlı olmaq lazımdır. Bizdə din dövlətdən ayrıdır. Bizim işimiz ibadət etmək, dua eləməkdir”.