Bu axşam - 9 avqust şam azanı zamanı qəməri təqvimi ilə Məhərrəm ayı daxil olur.

Ahlibeyt.az-ın məlumatına görə, Qafqaz Müsəlmanları İdarəsinin açıqlamasında bildirilir ki, Hicri-qəməri təqvimi ilə yeni 1443-cü ilin başlanğıcı – Məhərrəm ayının 1-ci günü Miladi təqvimlə 2021-ci il avqust ayının 10-na, Məhərrəm ayının 10-u - Aşura günü isə 2021-ci il avqust ayının 19-na təsadüf edir.

QMİ-dən bildirilir ki, Məhərrəmlik bu il də dünyada davam edən koronavirus bəlası ilə əlaqədar müvəqqəti məhdudiyyətlər şəraitində keçəcəkdir: "Məcburi karantin tədbirləri virus təhlükəsinin çoxalmaması üçün insanların sıx toplaşmaması qaydalarını nəzərdə tutur. Nazirlər Kabineti yanında Operativ Qərargahın qərarına əsasən, sosial məsafənin təmini mümkün olmayan kütləvi mərasimlərdə virusa yoluxma sayının artma təhlükəsini nəzərə alaraq, Qafqaz Müsəlmanları İdarəsinin Qazılar Şurası və səlahiyyətli nümayəndələri tövsiyə edirlər ki, bu il Məhərrəmlik dönəmində məscid və ziyarətgahlarda ibadətlərin və mərasimlərinin karantin qaydalarına uyğun olaraq keçirilməsi vacibdir."

Məhərrəm ayı İmam Hüseynin (ə.s.) matəm ayı olması ilə yanaşı, məhərrəm ayının ilk gecəsi yeni qəməri il başlayır.

On ikinci əsrdə yaşamış tanınmış islam alimi Seyyid ibni Tavus "Misbahuz-Zair" və "Muhəcud-Dəəvat və Mənhəcul-İbadat" əsərində yazır ki, zilhəccə ayının son günündə iki rəkətli namazın qılınması tövsiyə edilir. Bildirilir ki, qılınan iki rəkətli namazın hər ikisində Həmd surəsini 1 dəfə, İxlas sürəsini 10 dəfə, eləcə də Ayətəl-küsrsini 10 dəfə oxumaq lazımdır. Ardınca aşağıdakı münacatı oxumaq:

"İlahi ma əmiltu fi  hazihis-sənəti min əməlin nəhəytəni ənhu və ləm tərdəhu, və nəsituhu və ləm tənsəhu, və dəəvtəni ilət-tövbəti bədə ictirai ələykə. Allahummə fəinni əstəğfirukə minhu fəğfir li, və ma əmiltu min əməlin yuqərribuni iləykə fəqbəlhu minni, və la təqtə rəcai minkə ya Kərim!"

Tərcüməsi:

"İlahi bu ildə məni çəkindirdiyin bir sıra əməllərim oldu ki sən ondan razı deyilsən, Mən o (pis) əməli unutdum amma sən unutmadın, Sənə qarşı cürət etdikdən sonra yenə məni tövbəyə çağırdın, İlahi mən o əmələ görə səndən əfv diləyirəm, İlahi sənə yaxınlaşdıran əməli məndən qəbul et!, Sənə olan ümidimi kəsmə ey kəramət sahibi!"

Həmçinin Məhərrəm ayının ilk gecəsi 2 rükətli namaz qılmaq müstəhəbdir. Namazın “məhərrəm ayının ilk gecəsinin namazı” niyyəti ilə qılınır və hər rükətdə “Fatihə”dən sonra 11 dəfə “İxlas” surəsi oxunur.

İlk gecəni əhya saxlayıb ibadətdə keçirmək də müstəhəbdir. Bütün gecəni ayıq qala bilməyənlər bacardıqları qədər əhya saxlaya bilərlər.

Məhərrəm ayının ilk günü oruc tutmaq müstəhəbdir. Qəzası olmayanlar “məhərrəm ayının ilk gününün orucu” niyyəti ilə, qəzası olanlar isə qəza niyyəti ilə oruc tuta bilərlər.

Habelə, məhərrəm ayının ilk günündə də iki rükət namaz qılmaq müstəhəbdir. “Məhərrəm ayınını ilk günü” niyyəti ilə qılınan bu namazdan sonra 3 dəfə aşağıdakı dua oxunur:

«اللّهم انت الاله القدیم و هذه سنةٌ جدیدةٌ فاسئلك فیها العصمة من الشیطان و القوَّة علی هذه النّفس الامّارة بالسُّوء»

Allahummə əntəl ilahul qədim və hazə sinnətun cədidətun fəəs-əlukə fiha əl-ismətu min şeytan vəl quvvətu əla hazihin nəfsəl əmmarətə bissu.

“İlahi, sən əzəli və səxavətli Allahsan. Və bu yeni ildir. Səndən istəyirəm ki, məni şeytandan qoruyub pisliyə çağıran nəfsim üzərində qalib edəsən”.