Fələstin Muxtariyyəti Beynəlxalq Cinayətlər Məhkəməsindən İsrailin hücumları və qanun pozuntuları ilə bağlı edilən şikayətlərə baxılması işinin sürətləndirilməsini istəyib.

Ahlibeyt.az-ın məlumatına görə, SalamNews Palinfo.com-a istinadla xəbər verir ki, bu barədə Fələstinin Xarici İşlər Nazirliyi bəyanat verib.

Bəyanatda Beynəlxalq Cinayət Məhkəməsindən tələb edilib ki, İsrailin işğal siyasəti, qanun pozuntuları və son hücumları ilə bağlı edilən şikayətlərə baxılması işini sürətləndirsin.

Qeyd edək ki, BCM ötən il fələstinlilərin İsrailə qarşı müharibə cinayətlərilə bağlı şikayətlərini təmin edəcəyini bildirmişdi. Bundan sonra ABŞ adıçəkilən məhkəmənin bəzi hakimlərinə sanksiya tətbiq etmişdi.

Bildirək ki, İsrailin Qəzzaya hava zərbələri, Qəzzadakı fələstinli hərəkatların buna raket cavabı hələ də davam edir. İndiyə qədər Qəzzada 27 nəfərin həyatını itirdiyi deyilir. Onlardan doqquzu uşaqdır. Eyni zamanda işğal altında olan İordan çayının qərbində əksər bölgələrdə əl-Əqsaya və Qəzzaya hücumla bağlı etiraz aksiyaları keçirilməkdə və qarşıdurmalar baş verməkdədir.