Rusiya Xarici İşlər Nazirliyi (XİN) Bakı ilə İrəvan arasında davamlı sülhə və mehriban qonşuluq münasibətlərinin qurulmasına istiqamətlənən təşəbbüsləri alqışlayır.

Ahlibeyt.az-ın APA-ya istinadən xəbərinə görə, Rusiya XİN-in rəsmi nümayəndəsi Mariya Zaxarova bu gün keçirdiyi brifinqdə bildirib ki, buna etibarlı əsas Rusiya, Azərbaycan və Ermənistan liderlərinin 9 noyabr 2020-ci il və 11 yanvar 2021-ci il tarixli razılaşmalarıdır.

“Rusiya bundan sonra da bu cür prosesə hər bir yardımı etməyə hazırdır. Əlbəttə ki, həm Azərbaycan, həm də Ermənistan sadə olmayan qarşılıqlı etibarlı güvənin qurulması yolunun başlanğıcındadırlar. Qarşıda az olmayan çətinlikləri, maneələri aşmaq var. Cənubi Qafqazın sabitliyi, dayanıqlı iqtisadi inkişafı Rusiyanın bu regiondan olan bütün tərəfdaşlarının marağına cavab verir. Ümid edirik ki, praktiki işlərdə tərəflər ayırıcı xətlərə deyil, münasibətlərin normallaşmasına və inam atmosferinin yaradılmasına istiqamətlənən addımlara səy göstərəcəklər”, - deyə M. Zaxarova qeyd edib.