Sələfilər Quran payladıqlarına görə Almaniyadan qovula bilərlər

Almaniyanın Bavariya federal torpağının hökumət üzvü Hans Piter Fridrih bəyanat yayıb. “Shia-online”ın xəbərinə görə, bəyanatda deyilir ki, sələfi təriqətindən olan Almaniya vətəndaşları ölkədən çıxarılacaq. Bunun səbəbi kimi Zolingen şəhərində bir dəstə sələfinin polisə hücum etməsi olub. Almaniya hökumətinin digər yüksək rütbəli üzvləri ilə müzakirələrdən sonra, onların ölkədən çıxarılması qərarı verilib. H.P. Gridrihin sözlərinə görə, Almaniyada 4 minə yaxın sələfi yaşayır ki, onların ölkədən çıxarılması asan iş olmayacaq.

Mətbuatda gedən məlumata əsasən, Almaniya rəhbərliyinin belə bir qərar verməsi sələfilərin ictimai fəaliyyəti ilə bağlıdır. Onlar bir müddət öncə pulsuz Quran paylamış və Həzrət Rəsuli-Əkrəmə (ə) həqarət məqsədilə təşkil olunan karikatura müsabiqəsinə etiraz etmişdilər.

Zolingen şəhərində baş verən hadisənin təfərrüatı belə olmuşdu – karikatura müsabiqəsinə etiraz edən sələfilərin qarşısına neonasistlər çıxdılar. Polis onların arasına girərək qarşıdurmanın qarşısını almaq istədi. Lakin neonasistlər Həzrət Peyğəmbəri (s) təhqir etdilər. Bu zaman sələfilər onlara daş atmağa başladı. Polisin neonasistlər tərəfinə keçməsi barədə də məlkumatlar var. 81 nəfər sələfi həbs edildi, onların yığışdığı “Milləti-İbrahim” məscidində isə yoxlama aparıldı. Almaniya hökumətinin də narazılığına məhz bu  səbəb olmuşdu. Ölkə rəsmiləri onların etirazını “terror” kimi dəyərləndirmişdi.