Bəhreyn kralı konstitusiya islahatlarını təsdiqlədi, müxalifət isə narazıdır

Bəhreyn kralı Həməd Konstitusiyaya edilən əlavə və dəyişiklikləri təsdiqlədi. Islahatlara əsasən, nazirlər kabineti ilə parlamentin səlahiyyəti genişləndirilib. Müxalifət isə islahatları qeyri-adekvat hesab edir və nümayişlərin davam etdirilməsinə çağırış edir. Müxalifət daha demokratik islahatlar tələb edir.

Özünü islahatçı sayan kral bildirib: “Hakimiyyətə gəldiyim vaxtdan başlanan islahatlar dayanmayacaq”. Kral bütün siyasi qüvvə və qrupların bu işdə ona dəstək verəcəyinə ümidini dilə gətirib. 1999-cı ildə taxta çıxan kral Həməd dialoq üçün qapıların hələ də açıq olduğunu, milli vəhdət imkanlarının tükənmədiyini bildirib. Bu barədə ABNA-nın ingilis dilli saytı xəbər verir.

Yeni islahatlara əsasən, kral parlamenti buraxmamışdan öncə seçkili parlament rəhbərliyi və təyinli Məsləhət Şurası ilə məsləhətləşməlidir. Parlamentin seçkili palatası baş nazirin təyinatı ilə bağlı kral qərarını geri qaytara bilər. Lakin, son söz yenə də krala məxsusdur.

Müxalifət hesab edir ki, Konstitusiyaya edilən əlavə və dəyişikliklər cəmiyyətin real siyasi tələbatlarına cavab vermir və mahiyyət etibarı ilə siyasi sitemə yenilik gətirmir. Müxalif “Vəfaq” partiyasının təşkil etdiyi mətbuat konfransında müxalifət liderləri bəyan etdilər ki, kralın islahatları Manama sənədlərinin tələblərinə cavab vermir. Qeyd edək ki, Manama sənədləri ölkədəki siyasi böhranı həll etmək üçün müxalifətin təklif etdiyi yol xəritəsidir. Habelə bu islahatlar hətta vəliəhdin ötən il vəd etdiyi islahat proqramı ilə uzlaşmır. Müxalifət bildirib ki, Bəhreyn xalqı mübarizəsindən əl çəkməyəcək və bu cür oyunlara uymayacaq. Qeyd edək ki, həmin konfransda “Vəfaq”la yanaşı “Vəəd” və “Əxaə” partiyaları da iştirak edirdilər.