Muzey statusu dəyişdirilərək məscidə çevrilən Ayasofyaya hicabsız, qısa və ya dekolte geyimdə girməyə icazə verilməyəcək.

Ahlibeyt.az-ın məlumatına görə, “Qafqazinfo” “Ensonhaber”ə istinadən xəbər verir ki, 86 il muzey statusu daşıyan "Aya-Sofyanın" məscidə çevrilməsi ilə bu ibadət ocağına giriş üçün yeni geyim qaydaları tətbiq olunmağa başlanılıb. Bunun üçün məscidin girişində müvafiq geyim qaydalarını əks etdirən stendlər quraşdırılıb.

Qaydalarda məscidə hicabsız, qısa və ya dekolte geyimdə daxil olmağın qadağan olduğu bildirilir. Ayasofya məscidini ziyarət etmək istəyənlər üçün məscidin girişində turistlərə kombinezon və hicab paylanılır.

Xatırladaq ki, Türkiyə məhkəməsi İstanbuldakı Aya Sofya məbədinin muzeydən məscidə çevrilməsi ilə bağlı qərar verib. Danıştay (dövlət idarəçiliyi ilə bağlı işlərə baxan məhkəmə) Aya Sofyanın məsciddən muzeyə çevrilməsinə dair 24 noyabr 1934-cü il tarixli Nazirlər Kabinetinin qərarını ləğv edib. “Aya-Sofya”  2020-ci il 24 iyul tarixində ibadətə açıq elan olunub.Türkiyə Prezidenti Rəcəb Tayyip Ərdoğan 86 il sonra ilk dəfə qılınacaq cümə namazında iştirak edib.