Namaz vaxtları dükanların bağlanması bidətdir!

Səudiyyə Ərəbistanı İstintaq və prokurorluq Bürosunun üzvü Abdullah əl-Əvilat namaz vaxtları ticarət obyektlərinin bağlı olmasını bidət adlandıraraq, bunun dinə və ağıla zidd olduğunu bildirib.

O sağlam təfəkkürün bunu qəbul etmədiyini bildirərək deyib ki, eyni zamanda bütün ticarət obyektlərinin bağlı olması xalqın zərərinədir və din əslində zərərləri aradan qaldırmaq üçün gəlib.

Öz sözlərinə hədislərlə istinad edən alim bildirib ki, Peyğəmbər(s) zamanı belə bir şey olmayıb və buna görə bu əməl bidətdir. O həmçinin bildirib ki, namaz vaxtı dükanların bağlanması qəlbdən gəlməli olsa da bu məcburiyyətlərlə biz bunu səmimilikdən uzaqlaşdırmışıq.

Qeyd edək ki, Səudiyyə Ərəbistanının qanunlarına əsasən namaz vaxtlarında bütün dükanlar, restoranlar, banklar və hətta apteklər belə bağlı olmalıdır. Və şəriət polisi namaz vaxtları küçələrdə gəzişərək açıq olan obyekt sahiblərini cərimələyirlər.