Fələstini tanımağa hazırıq-İspaniya XİN-dən açıqlama

İspaniya Avropa İttifaqı çərçivəsində Fələstinin müstəqil dövlət kimi tanınması hərəkatına başçılıq etmək niyyətindədir.

Ahlibeyt.az-ın məlumatına görə, İslamazeri.com-un “Islam Today”-ə istinadən verdiyi xəbərə əsasən,  bu haqda İspaniyanın xarici işlər naziri Xosep Borrel açıqlama verib.

Onun sözlərinə görə, İspaniya yaxın zamanda Avropadan olan öz həmkarları ilə bu məsələ üzrə “intensiv” məsləhətləşmələrə başlamaq niyyətindədir.

O qeyd edib ki, əgər Avropada bu məsələyə dair həmrəylik əldə olunmasa, İspaniya birtərəfli qaydada Fələstini müstəqil dövlət kimi tanımağa hazırdır.

Xatırladaq ki, İspaniya 2014-cü ildə Böyük Britaniya və İrlandiya ilə yanaşı Fələstinin tanınması üzrə simvolik sənəd qəbul edib, lakin bu qətnamə icbari qüvvəyə sahib deyil.