Hicab Məhbusunun oğlu yenidən həbs olundu

Nəsimi rayon Prokurorluğunun protest etdiyi üçün Bakı Apellyasiya Məhkəməsi Kamran Abbasovun barəsində 1 ay müddətinə həbs qəti imkan tədbiri seçib.

Favralın 10-u Bakı Apellyasiya Məhkəməsində, Masallı ruhanisi Fəramiz Abbasovun oğlu Kamran Abbasovun həbs edilməsi ilə bağlı Nəsimi rayon Prokurorluğunun protestinə baxılıb. Qeyd edək ki, K. Abbasov atasının cinayət işi üzrə dindirilən şahid Əlihüseyn Kərimova təzyiq göstərməkdə, onu döyüb, xəsarət yetirməkdə ittiham edilir.

Onun barəsində Nəsimi rayon Polis İdarəsində 15 sentyabr 2011-ci ildə cinayət işi başlayıb və araşdırma aparılıb. Bu ilin fevralın 3-də Nəsimi rayon Prokurorluğu Kamran Abbasovun barəsində həbs qəti imkan tədbirinin seçilməsi ilə bağlı rayon məhkəməsinə şikayət edib. Lakin Nəsimi rayon Məhkəməsi prokurorluğun təqdimatını əsassız hesab edib və K. Abbasovun həbs edilməməsinə qərar verib. Prokurorluq isə onun tutulması üçün apelyasiya protesti verib.

Bakı Apelyasiya Məhkəməsində, hakim Mirzəli Abbasovun sədrliyi ilə keçirilən prosesdə Nəsimi rayon Məhkəməsinin qərarı ləğv edilib.

Yeni çıxarılan qərara əsasən, K. Abbasovun barəsində 1 ay müddətinə həbs qəti imkan tədbiri seçilib. O, məhkəmə zalında həbs edilərək, Penitensiar Xidmətin Bakı istintaq təcridxanasına aparılıb.

Xatırlatmaq istərdik ki, Kamran Abbasovun atası Fəramiz Abbasovun üzünə duran şahidlər Masallı polis əməliyyatçısı Nazim Əkbərov, Masallı rayon sakini Camal Qasımov indi də onun üzünə duraraq Nəsimi polisinə Kamran Abbsovun Əlihüseyn Kərimovu döydüyünü bildirmişdilər.
Masallı rayon polis idarəsinin cinayət axtarış bölməsinin rəisi Əbülfət Abdullayev də yazılı izahat verərək Əlihüseyn Kərimovu Kamran Abbasovun döydüyünü yazmışdı.

Yenə də qeyd etmək istərdik ki, şikayətçi Əlihüseyn Kərimov və hər üç şahid Nazim Əkbərov, Camal Qasımov və Əbülfət Abdullayev Fəramiz Abbasova qarşı sürülən yalançı ittihamlara görə Seyyid Fəramizin üzünə duraraq şahidlik etmiş şəxslərdir.

xeber44.com