ABŞ-ın məqsədi Suriyada terrorçulara qarşı vuruşmaq deyil - Türkiyədən açıqlama

Türkiyə hökuməti ABŞ-ın Suriyadakı fəaliyyətlərini tənqid edib.

Türkiyənin Baş nazirinin müavini Bəkir Bozdağ Suriyada fəaliyyət göstərən ABŞ koalisiyasını bu ölkədə terrorçulara qarşı mübarizə aparmamaqda ittiham edib.

Ahlibeyt.az-ın məlumatına görə,İslamazeri.com "Sputnik"-ə istinadla xəbər verir ki, türkiyəli rəsmi Raqqadakı İŞİD üzvlərinə şəhəri sağ-salamat tərk etmələri üçün ABŞ komandalığı ilə terrorçular arasında əldə edilmiş razılaşmanı tənqid edib.

Bildirək ki, bundan əvvəl BBC ABŞ-ın himayə etdiyi kürdlərdən təşkil olunmuş Suriya Demokratik Qüvvələri (SDQ) ilə terrorçular arasında danışıqların baş tutduğu barədə məlumat yayıb. Həmin danışıqlarda əldə edilmiş razılaşmaya əsasən 250 İŞİD üzvünə Raqqanı tərk etmək üçün icazə verilib. "Terrorçulara qarşı hər hansı açıq mübarizə heç vaxt gündəmlərində olmayıb. Yoxsa ki, Vaşinqton bir terror təşkilatına qarşı mübarizə aparmaq adı altında digər terror təşkilatı ilə əməkdaşlıq etməzdi. Bu ağılasığmaz bir şeydir, amma faktdır. Əgər, həqiqətən, terrorçulara qarşı mübarizə aparmaq məqsədləri olsaydı, Türkiyə kimi güclü ölkə ilə əməkdaşlıq edərdilər", - deyə Bozdağ açıqlamasında bildirib.