Azərbaycanlı xanım beynəlxalq hafizlik müsabiqəsində iştirak edib - Foto

29 mart – 3 aprel tarixlərində İordaniya Haşimilər Krallığında  qadın hafizələr arasında beynəlxalq Qur`ani-Kərim Tilavəti müsabiqəsi keçirilib.

Ahlibeyt.az-ın verdiyi xəbərə görə, QMİ mətbuat xidmətinin məlumatında qeyd olunur ki, müxtəlif ölkələri təmsil edən xanım hafizələrlə yanaşı müsabiqədə Azərbaycan nümayəndəsi də çıxış edib.

Məlumata görə, İordaniyada ölkəmizi “Şəbnəm” İslam kollecinin hafizlik müəlliməsi Cəmilə Nəbiyeva təmsil edib. Yarışmada uğurla çıxış edən təmsilçimiz təşkilat komitəsi tərəfindən “Təşəkkürnamə” diplomu ilə təltif olunub.

Qeyd edək ki, təşkilat komitəsi yarışmaçılar üçün maraqlı ziyarət proqramı hazırlayıb. Müsabiqə iştirakçıları İordaniya ərazilərində yerləşən müxtəlif tarixi ziyarətgahları, o cümlədən, Əshabi-Kəhf mağarasını, Həzrəti Yuşa ibn Nun (ə.s) və Həzrəti Əbu Ubeydullah bin Cərahın məqbərələrini, eləcə də Kral Hüseyn məscidini və Ölü dənizi ziyarət ediblər.