Türkiyə Rakka əməliyyatı ilə bağlı ilkin şərtini açıqlayıb

"Rakka əməliyyatı PYD, PKK və YPG qüvvələri olmadan həyata keçirilsin, Türkiyənin ilkin şərti budur."

Ahlibeyt.az-ın SalamNews-a istinadən verdiyi xəbərə görə, bunu Türkiyənin müdafiə naziri Fikri Işık bildirib. Onun sözlərinə əsasən, Türkiyə əməliyyatlarda yerli qüvvələrin iştirakını dəstəkləyir: "O bölgənin insanlarından başqa oraya kənar oyunçular cəlb etsəniz, sabah İŞİD oradan təmizlənsə də, daha böyük problemlər yaranmış olacaq. Çünki o bölgənin demoqrafik quruluşu var, o demoqrafik quruluşu dəyişdirmək üçün atılan hər addım bölgədə daha böyük gərginliklərə, daha böyük problemlərə səbəb olur. Bu səbəblə bizim Amerikaya söylədiyimiz budur. Fikrimizi Londonda Amerikanın müdafiə nazirinə də çatdırdıq. Həm Mosulda, həm Rakkada PYD və ya YPG qətiyyən iştirak etməməlidir. Burada yerli qüvvələrdən istifadə etmək lazımdır."

F.Işık əlavə edib ki, əməliyyatlar zamanı Türkiyə koalisiya çərçivəsində dəstək verəcək: "Biz müxtəlif şəkildə dəstəkləyə bilərik. O dəstəyi verək, amma əsasən yerli qüvvələr cəlb edilsin."