Gürcüstanda “Aşura vaqiəsi” və "Kərbəla qiyamı" adlı rəsm yarışması elan edilib

Gürcüstan Müsəlmanları İdarəsi (GMİ) gələn ay Məhərrəm ayının başlanması ilə bağlı rəsm müsabiqəsi elan edib.

Ahlibeyt.az-ın məlumatına görə, GMİ-nin şeyxi Hacı Ramin İgidov  açıqlama verərək bildirib ki,qarşıdan gələn məhərrəm ayında keçiriləcək rəsm müsabiqəsinin mövzusu “Aşura vaqiəsi” və “Kərbəla qiyamı”dır:

Müsabiqənin şərtlərində bildirilir:

Böyüklər və eyni zamanda az yaşlılar üçün keçirilən yarışda rəsmlər А4 (albom vərəqi) və А3 formatlarında qələm və ya fırça ilə istənilən üslubda qəbul edilir.

Ən yaxşı rəsm işlərinin seçilməsi zamanı əsas meyarlar bunlar olacaq: mövzunun açılması, kreativlik (yaradıcılıq qabiliyyəti) və rəsmin pozitivliyi.

Əl işləri oktyabrın 1-dən 15-dək Tbilisi Cümə məscidində qəbul ediləcək.

Hər bir rəsmin arxasında müəllifin adı, soyadı, yaşı, ünvanı və əlaqə üçün telefon nömrəsi kimi zəruri məlumatlar qeyd edilməlidir.

Qaliblərin elan edilməsi və mükafatlandırılması 18 oktyabr üçün nəzərdə tutulub.

Qaliblərə noutbuk, planşet, fotoaparat və digər mükafatların təqdim edilməsi nəzərdə tutulub.