• Dünyada

Avropa Parlamentində jurnalistə hicab qadağası

Avropa Parlamenti Mətbuat Bürosu rəsmiləri Avropa Parlamentinin yanvar ayı iclaslarını və Türkiyənin Avropa Birliyi (Aİ) naziri Volkan Bozkırın görüşlərini izləmək üçün Strasburq şəhərində fəaliyyət göstərən Türkiyənin "Anadolu" Agentliyinin müxbirinə "hicabını açmadan akkreditasiya kartı verməyəcəklərini" deyib.

Ahlibeyt.az-ın Faktxeber-ə istinadən məlumatına görə,müxbir bildirib ki, daha əvvəl bir neçə dəfə Avropa Parlamentində və Avropa Şurasında iclasları izləmək üçün akkreditasiya olub və belə bir çətinliklə qarşılaşmayıb. Bu sözlərinə cavab olaraq isə akkreditasiya edən rəsmi şəxs ona bildirilib ki, "O halda, başqa qapıdan daxil olmağa çalışın. Başınız açıq fotonuzu çəkməsəm, sizə kart vermərəm".

"Anadolu" müxbiri və Avropa Parlamentinin rəsmisi arasındakı mübahisəni lentə almaq istəyən TRT operatoruna isə təzyiq göstərilərək, çəkdiyi görüntülər zorla sildirilib.

Təhlükəsizlik xidmətinin əməkdaşı digər Türkiyə mətbuat mənsublarının da içəri girişinə icazə verməyərək, TRT operatorunu da akkreditasiya kartını əlindən almaqla təhdid edib.

"Anadolu" müxbirinin israrla tətbiqin hüquqi əsasını soruşmasından sonra məsələyə müdaxilə edən protokol məmuru vəziyyətin səhv başa düşüldüyünü, müxbirin baş yaylığını "bir az geriyə çəkərək" foto çəkdirə biləcəyini, bu şəkildə akkreditasiya almasında problem olmayacağını söyləyib.

Müxbir təxminən yarım saat davam edən hadisədən sonra fotoşəkil çəkdirərək görüşləri izləyə bilib.

Saytın materiallarından istifadə edərkən istinad vacibdir!

21 Yanvar, 2016 09:26 ⁄ Çap