Ölkə ərazisində matəm elan olundu - Bütün teatr və konsert müəssisələrində tamaşa,konsert və filmlərin nümayişi dayandırıldı

Ölkə ərazisində matəm elan olundu - Müvafiq sərəncamı Prezident İlham Əliyev imzalayıb

Ahlibeyt.az-ın məlumatına görə,Azərbaycan Respublikası Dövlət Neft Şirkətinin “Günəşli” yatağının 10 saylı stasionar dərin dəniz özülündə baş vermiş qəza nəticəsində həlak olanların xatirəsini yad etmək məqsədi ilə Azərbaycan Respublikasında matəm elan edilməsi haqqında Azərbaycan Respublikası Prezidentinin Sərəncamında deyilir:

"2015-ci il dekabrın 4-də Azərbaycan Respublikası Dövlət Neft Şirkətinin “Günəşli” yatağının 10 saylı stasionar dərin dəniz özülündə güclü qasırğanın doğurduğu qəza nəticəsində çoxsaylı insan tələfatı olmuşdur. Xəzər dənizində itkin düşənlərin axtarışı və xilas edilməsi tədbirləri davam etdirilir.

Qəza nəticəsində həlak olanların ailələrinin dərin kədərinə şərik olaraq qərara alıram:

2015-ci il dekabrın 6-da Azərbaycan Respublikasının ərazisində matəm elan edilsin."

Ölkə ərazisində elan olanun matəmlə əlaqədar olaraq, Mədəniyyət və Turizm Nazirliyinin strukturunda olan teatr və konsert müəssisələrində bütün tamaşa və konsertlər ləğv edilib.

Nazirliyin informasiya və ictimaiyyətlə əlaqələr şöbəsinin yaydığı məlumatda bildirilir ki, Nizami Kino Mərkəzində də bütün filmlərin yayımı dayandırılıb.

Qeyd edək ki,rəsmi məlumata görə hadisə baş verən zaman platformada 64 nəfər olub. Onlardan 2-si dünyasını dəyişib, 33 nəfər təxliyyə olunub. 29 nəfərin taleyi isə hələlik naməlumdur. Onlar itkin düşmüş elan edilib. Ötən gün başlayan axtarış-xilasetmə əməliyyatları bu gün səhərdən dalğıcların cəlb olunması ilə davam etdirilir.