Türkiyədə azərbaycanşünaslıqla bağlı beynəlxalq simpozium maraq doğurub

Türkiyənin Qars şəhərində "Azərbaycanşünaslığın keçmişi, bu günü və gələcəyi" mövzusunda beynəlxalq simpozium keçirilib.

ahlibeyt.az-ın Salamnews-a istinadən məlumatına görə, tədbir Qars Qafqaz Universitetində fəaliyyət göstərən Azərbaycan dili və ədəbiyyatı bölməsinin 10 illik yubileyinə, həmçinin dil, folklor, ədəbiyyat, sənət və tarix məsələlərinə həsr olunub.

Tədbirə Türkiyənin müxtəlif universitetlərindən, Azərbaycan, Gürcüstan, İran, Qırğızıstan, Qazaxıstan və digər ölkələrdən 100-ə yaxın alim və araşdırmaçı qatılıb.

Simpoziumun açılış mərasimində Azərbaycanın Türkiyədəki səfirliyinin təhsil müşaviri Nəcibə Nəsibova, Azərbaycanın Qars şəhərindəki baş konsulu Ayxan Süleymanlı, Qars Qafqaz Universitetinin və Ərdahan Universitetinin rektorları professor Sami Özcan, professor Ramazan Qorxmaz və başqaları çıxış edərək azərbaycanşünaslığın tarixindən danışıblar, Azərbaycan və Türkiyə arasında ortaq mədəniyyət haqqında mülahizələrini bölüşüblər.

AMEA alimlərinin, Təhsil Nazirliyinin nümayəndəsi Müjkan Məmmədzadənin, Naxçıvan Dövlət Universitetinin prorektoru Surə Seyidin, Universitetin müəllimləri Mehriban Quliyevanın, Gülnarə Qəmbərovanın və digər mütəxəssislərin məruzələri konfrans iştirakçılarının böyük marağına səbəb olub.