Gürcüstanda azərbaycan dilində 2 dini dərs vəsaiti hazırlanıb

Gürcüstan Müsəlmanları İdarəsinin (GMİ) Elmi-Dini Heyətinin qərarı ilə azərbaycanca iki dini dərs vəsaiti çap edilib.

Ahlibeyt.az-ın Salamnews-a istinadən verdiyi xəbərə görə,bu barədə GMİ-nin sədri Hacı Ramin İgidov məlumat verib.

Onun sözlərinə görə, birinci - “Quranın dili” adlı 72 səhifəlik irihəcmli kitabda ərəb əlifbası, 30-cu cüz və İlahi kitab barədə sual və cavablar dərc olunub.

İkinci - “Din təlimi” adlı 256 səhifəlik A4 formatda nəşr olunan kitab, islamın əqidə üsulları, dini-şəri hökmləri, islam tarixi (Peyğəmbər (s) və xanım Fatimeyi Zəhranın (ə), imam Əlinin (ə) və digər imamların həyatı) və İslam əxlaqından bəhs edir.

Məscid, mədrəsə və digər ibadət məkanlarında gənc və yeniyetmələr səviyyəsində birillik Quran kursu və din təlimi proqramı üçün tədris materialı kimi nəzərdə tutulan dərsliklər gələn həftə 85 axund və din xadiminin iclasında şagirdlərinin sayına görə onlara təqdim olunacaq.

Artıq Quranı ərəb dilində üzündən oxuya bilənlərə isə GMİ tərəfindən ərəbcə Qurani-Kərim hədiyyə olunacaq.