Londonda minlərlə müsəlman etiraz etdi

Londonda minlərlə müsəlman Charlie Hebdo jurnalında və digər mətbu orqanlarında Məhəmməd Peyğəmbərin karikaturasının dərcinə ilə bağlı etiraz mitinqi keçirib.

Ahlibeyt.az-ın AzərTAc-a istinadən verdiyi xəbərə gröə, mitinqi təşkil edən Britaniyanın Müsəlman Hərəkatı Forumunun yaydığı məlumatda bildirilir ki, söz azadlığı artıq başqalarının müqəddəs saydığı şəxslərin təhqir edilməsi dərəcəsinə qədər aşağı salınıb. Bu barədə Press Association agentliyi məlumat yayıb.

Britaniya müsəlmanları həmçinin Charlie Hebdo jurnalında törədilən qətlləri pisləyib və bunun İslam qanunlarının pozulması olduğunu bildiriblər. 100 mindən artıq Britaniya müsəlmanı müraciət imzalayaraq peyğəmbərin karikaturalarının dərc edilməsini sivil cəmiyyət normalarının təhqir olunması demək olduğunu bəyan ediblər.

Bu gün İordaniyada səfərdə olan Böyük Britaniya şahzadəsi Çarlz da islamın İŞİD tərəfindən təhrif olunmuş şəkildə təqdim olunmasını pisləyib.